Уставные заметки - Служба священномученику Илариону (Троицкому)

Ко дню памяти новосвященномученика Илариона (Троицкого) выкладываю в «Уставные заметки» великобденную службу святому, составленную в ставропигиальном Сретенском монастыре г. Москвы. Её текст воспроизводится (текстовым перенабором гражданской азбукой) по изданию: Священномученик Иларион. Служба и житие. М.: Изд-во Сретенского монастыря, Ильинский скит, 2001 (служба на стр. 3 – 33). За бесценную помощь в оцифровке службы благодарность достопочтенному vit_gil. Молитва святому, промещённая в конце службы, составлена в Соловецком монастыре.

Егда Божиим попущением прииде на Церковь гонение лютое, воздвиже тя Господь, Иларионе, Церкве непоколебимый столпе, мучеников украшение, сосуде честный Духа Святаго.
Егда любы и вера оскудесте, и предания отеческая забвена быша, Иларионе богомудре, твоим богословием тьму лжеучения разсеял еси, святых отцев наследниче.
Егда волны ересей Церковь Божию тщашася потопити, ты, Иларионе, огненная словеса испущая, хитросплетения богоборцев разрушил еси.
Егда шатания и волнения смущаша Церковь Божию, твоими труды и молитвами, Иларионе, Церковь в безбожнем мире утвердил и управил еси.
Кто возможет восхвалити тя, избранниче Божий и Церкве Христовы служителю, ересей обличителю и расколов искоренителю, ты бо колеблющыяся вразумляяй, и заблуждшыя на путь истинный наставляяй, врагом Христовым противоста, злобу диаволю посрамил еси и Христа мужески исповедал еси, Того моли спастися душам нашим.
Богородице Дево Чистая, Ты бо Церкве Христовы Покрове, покрый нас от всякаго зла и обстояния, сохраняющи чтущыя Тя.
Доблестный святителю, святаго Патриарха Тихона сподвижниче, ласкательства безбожник возненавидел еси и соблазны их отвергл еси, яко адамант на судилищи неправеднем стоя, злострадания темничная претерпевая, венец победный стяжал еси.
Стих: Многи скорби праведным, и от всех их избавит я Господь.
Увы мне, како возглаголю? Краса Соловецкая поругана бысть. Но ты, архиерею Божий, мерзость запустения в свято место претворил еси, легеоны бесовския прогоняя, егда во узах в нощь святыя Пасхи возгласи: да воскреснет Бог и расточатся врази Его.
Стих: Уста праведнаго поучатся премудрости, и язык его возглаголет суд.
Премудрый наставниче пастырей, в Соловецких мразех пастырски подвизался еси, разбойники на стезю покаяния направляя, отступники святыя веры обличил еси, малодушныя утешая, изнемогающыя укрепляя, Христовы овцы от волка мысленнаго спасл еси.
Марие Мати Пастыреначальника, буди пастырем православным Помощнице, Церкве Христовы несокрушимая стено, сохраняющи от раздоров и нестроений, наипаче же от злобы безбожия и лютых ересей.
О, священномучениче Иларионе, поборниче патриаршества ревностный, святому патриарху Тихону помощник был еси, Церковь Божию соблюдая во дни искушений.
Днесь радуется обитель Сретенская, таковаго имущи помощника и заступника, Илариона чуднаго, ты бо, святителю Иларионе, еретиков и богоборцев из обители прогна, труды же твоими обитель прославив. Буди нам хранитель и молитвенник, сопротивныя отгоняя и наставляя ны Православно Святую Троицу почитати.
О, богомудре Иларионе, благодатию Святаго Духа разум просветивый, совопросники лукавыя опровергл еси, истину Православия утверждая. Где премудр, где книжник, где совопросник века сего? Словом о Кресте ты посрамил еси мудрость мира.
Агнцу Божию уподобився, беззлобно темничная страдания претерпе, угрозы и поношения, глад, мраз и болезни: за враги твоя моляся, Иларионе, кротко душу Христу предал еси.
От Бога обогащен чистотою душевною, постническими подвиги благодать Святаго Духа стяжал еси, добродетели любителю и греха потребителю, земный ангеле и небесный человече.
От юности Христа возлюбил еси, вся красная мира сего оставив, Иларионе славне, любы небесную позна, в лик иночествующих вселился еси, Богу угождая.
Очи сердечнии просветил еси, блаженне Иларионе, темже богословие твое от благочестия изыде, новый Златоуст явился еси, истину церковную утверждая и вся верныя ко спасению наставляя.
Видя яко враг рода человеча на страну Росскийскую ополчися, Церкви Божия сокрушая и люди Русския истребляяй, тогда болезнуя со слезами, владыко Иларионе, взыва ты к Российским угодником о спасении народа Божия.
Приидите людие Московстии, священномученику Илариону верно поклонимся, и тому подражающе, все упование на Христа возложим, и путем церковным последуем, нечестия мирскаго отвергнемся, в вере же и чистоте пребудем, поработаем Господеви и Его Церкви Святей, скорби и болезни до конца претерпим. Ты же, святый Иларионе, моли Христа Бога, да оставит нам долги наша и Царствия Небеснаго сподобит.
Днесь ликует Собор новомучеников Российских, имый таковый столп непоколебимый, Илариона архиерея всеславнаго, святаго Тихона сподвижника.
О, владыко Иларионе, стяжав разум церковный, ты, отцем последуя, о Церкви богословствова: сердце очистив подвигом, о людех болезнова: врагом Церкве противоста, верныя чада окормляя и на путь Истины наставляя. Ныне предстоя Святей Троице, молися о всех нас.
По имени твоему, Иларионе, и житие твое бысть: душевную тишину стяжал еси, бурю бо страстных помыслов утишил еси, чистым сердцем Бога познал еси. Всегда радуяся, о всем благодаря, ныне Христу предстоиши.
Радуйся, Богородице Чистая, церковная похвало, столпе девства. Премудрости приятелище, двере спасения. Не остави нас во тьме неведения пребывающих, просвети наша разумная очеса сердечная и сподоби ны узрети свет Царствия Небеснаго.
Дар благодати Божественныя прият, Иларионе, избранниче Божий, взем Крест, Христу последова, вся суетная мира отвергл еси, жизни же вечныя взыскал еси, ныне со всеми святыми на Небесех ликуеши.
Стих: На Тя, Господи, уповах, да не постыжуся во век.
Все упование на Бога возложил еси, воли Божии последуя, жезл архипастырский яко крест в годину гонений приял еси, к мученичеству ради Христа уготовляяся, Того пред мучителями исповеда и страдания претерпе, предстоиши ныне, Иларионе, радуяся, Христу, со святым патриархом Тихоном.
Стих: Веселитеся о Господе и радуйтеся, праведнии, и хвалитеся, вси правии сердцем.
Духовным веселием всегда исполнен, Иларионе дивный, ветхаго человека в себе распял еси и Христу в сердце пребывати дал еси, пасхальныя радости причастниче, Света Невечерняго зрителю, моли Христа Бога, да сподобимся и мы радости вечныя улучити.
Како наречем тя, святый владыко? Глубины ли церковныя таинника, богослова ли преизящнаго, церковнаго благолепия любителя, мудрости отеческия рачителя, проповедника златословестнаго, собеседника ангелом; недоумевает ум именовати тя, ты бо Церкви Русския утверждение, страны Российския славо, мучеников похвало.
Радуйся, Преблагословенная Владычице, Сын бо Твой воста из мертвых, мирови радость вечную дарова, да присно подает Своей Церкви мир и велию милость.
Воине Христов Иларионе, славо и похвало Церкве Русския, пред гибнущим миром Христа исповедал еси, кровми твоими Церковь утвердися, разум Божественный стяжал еси, людем верным возглашаше: без Церкве несть спасения.
Старческих седин не достигнув, мудрость старческую стяжал еси и Бога честным разумом познал еси, помози и нам причастники Божественныя премудрости соделатися.
О, Пресвятая Дево, Царице Небесная, из Тебе воплотися Божественное Слово, и Человек бысть, и на земли поживе, и на Кресте умре, и тридневно воста, и взыде на Небеса, и Духа Святаго посла, да мир обожится.
Днесь монахов множества наставника тя величают, святителю Иларионе, наипаче же иноцы обители Сретенския, крепкаго молитвенника и пред Богом теплаго ходатая имуще тя. Ты бо в годину гонений и еретических нападений и всяческих треволнений обитель Сретенскую окормил еси.
Пресвятая Богородице, Заре Светлая Трисиятельнаго Света, Тобою грады и обители утверждаются, козни вражия посрамляются, сердца верных чистотою и любовию просвещаются, супостаты низлагаются, подаждь и нам победы на враги и спаси души наша.
Воспоим, вернии, достойно священномученика архиепископа Илароина, за Церковь душу свою положившаго, Христова воина славнаго, на диавола противоборца. Да возвеселится ныне град Москва, и Петров град, и обитель Соловецкая: Русь Святая славит тя, честный владыко.
Мати Божия и Дево, в рождестве девство сохраншая, не остави ныне ны немощствующия, от бед и болезней сохрани и молитвами Твоими избави от смерти души наша.
Прокимен, глас 4: Возвеселится праведник о Господе и уповает на Него.
Стих: Господь просвещение мое и Спаситель мой, кого убоюся?
Бури бед и напастей волнуют море житейское, враг рода человеча яко волк злобный ищет, кого поглотити: увы мне, умножишася беззакония и оскуде любы: немощен телом и душею, взываю к тебе, владыко Иларионе: буди ми помощник и заступник, изцели мя и вразуми, на путь спасения направи и научи волю Божию творити.
Ирмос: Волною морскою Скрывшаго древле гонителя мучителя, под землею скрыша спасенных отроцы; но мы, яко отроковицы Господеви поим, славно бо прославися.
Иларионе, всечестный владыко, по имени твоему воистинну житие твое бысть, тишину бо молитвенну внутрь себе имый, радость пасхальную всем яви.
Лесть гонителей твоих отвергнув, мучения лютаго не убояся, Христа пред судиями неправедными мужески исповеда, в темницу заключен и пострада, славою небесною прославися.
Ангелов собеседниче, Иларионе преподобне, в обители Сергиевой, в доме Живоначальныя Троицы поживе, постом и молитвою душу очистив, боговедение стяжал еси.
Ревность по Бозе имый, еретических мудрований терпети не возможе, богоборцев cловом обличил еси, из обителей и храмов их изгоняя, многих к покаянию и спасению привел еси.
Богородичен: Иныя помощи не имамы, разве Тебе, Владычице, Ты нам помози моря жития сего пучину яко по суху проити неискушенно от злых.
Ирмос: Тебе, на водах Повесившаго всю землю неодержимо, тварь видевши на Лобнем висима, ужасом многим содрогашеся, несть Свят, разве Тебе, Господи, взывающи.
От Творца наделен добродетелей чистотою, Иларионе дивный, девственниче душею же и телом, не пожела твари поработати паче Творца, на грех вооружися, на земли невещественное житие показал еси.
Небесный человече, земный Ангеле, Иларионе премудре, Сергию преподобному в подвизех подража, Серафиму святому о спасении Руси моляшеся, Иоанна Богослова яко богослов преискусный покровителя имый.
Агнцу Божию подражая, Иларионе святый, кротостию, смирением и терпением, паче же любовию преукрашен быв, мучителей твоих простил еси, яко древле Бог твой и Спаситель.
Стяжа дар Духа Святаго, Сыну, Крест взем, последова, Отца Небеснаго волю исполняя, Иларионе блаженне, Троицы Святыя истинный почитателю.
Богородичен: Лествице Небесная, Еюже сниде Бог, Пресвятая Богородице, долу лежащее естество наше к Небеси возводиши, темже Тя любовию непрестанно величаем.
Егда прореченное возлюбленным учеником и Богословом совершишася, и антихристы мнози приидоша в мир, ты, Иларионе, архиерею и друг Христов, в темнице заключен быв, не восхотел еси предтече антихристову поклонитися, якоже мученицы святии не возжелаша жертву идольскую принести. Ныне же злу в мире умножившуся, знамения грозная зрим, трусы, глад и мор по всей вселенней, близ есть при дверех со апостолом речем. Потщися убо, святый Иларионе, и помози нам молитвами твоими стрелы вражия отразити и козни диаволи разорити, Единаго Христа распятаго выну очесы умными зрети и Тому из глубины сердечныя взывати: ей, гряди, Господи Иисусе.
Предстательнице и молитвеннице наша, Пресвятая Владычице, умоли Сына Твоего и Бога, егда сядет Он судити живым и мертвым, да простит Он грехи и беззакония наша, да не лишит ны Царствия Небеснаго.
Ирмос: На Кресте Твое Божественное истощание провидя Аввакум, ужасся вопияше: Ты сильных пресекл еси державу, Блаже, приобщаяся сущим во аде, яко Всесилен.
Апостол новый явился еси в безбожнем мире, Иларионе Богомудре, Христа Крестное истощание проповедал еси, тайну Церкве познал еси и конечныя судьбы твари уяснил еси.
Велия тайна есть Церкве Невесты Христовы, якоже Божественнии Апостоли вещаше, тоя глубину ты, Иларионе, чистым сердцем узрел еси и богословскими словесы провозгласил еси.
Небесныя любве дара удостоен был еси, Иларионе, Бога Троицу, Иже есть любы, исповедал еси и о Церкви Святей, иже есть любве единение, богословствовал еси.
Адамант веры быв, отеческих заветов хранителю, святителю Иларионе, ветрами лукавых учений несмущаемь пребыл еси, Богородицу Чистую яко Деву и Матерь прославил еси.
Богородичен: Голгофстей казни предстоящи, Матерь Божия скорбно взываше: увы, Сыне Мой! Како на Кресте висиши, землю на водах повесивый? Извести из ада земнородныя и мир обожити на землю Ты сошел еси.
Ирмос: Богоявления Твоего, Христе, к нам милостивно бывшаго, Исаия, Свет видев невечерний, из нощи утреневав взываше: воскреснут мертвии, и востанут сущии во гробех и вси земнороднии возрадуются.
О, Иларионе, святый владыко, помози нам нощь безлунную жития сего скорбнаго в терпении и покаянии без порока прейти, и радости Света Невечерняго сподобитися.
Христовым пастырем пастырь был еси, Иларионе, добрый, и наставник терпеливый, не токмо в богословии, но и в добродетели их наставляше, благодатию, тебе от Бога данною, души воскрешая.
Радостию духовною всегда украшен был еси, Иларионе, шествова путем тесным и прискорбным, всех уча Христу сраспинатися, в постах и молитвах подвизатися, скорби и нужду без ропота терпети, дабы воскресения радости не лишитися.
Иноцы обители Сретенския днесь радуются, прославляюще архипастыря Илариона славнаго, почитателя Девы и Матере Господа, сретившаго икону Ея чудотворную Владимирскую, в праздник в обитель приносимую, и за то гонения от безбожник претерпевшаго.
Богородичен: Славим Тя неумолчно, Владычице, и ко иконе Твоей святей Владимирстей припадаем, взывающе: изведи град Москву, егоже ты от врагов древле спасла еси, из пучины греховныя, и огради обитель Сретенскую от всех наветов вражиих, и спаси души наша.
Ирмос: Ят бысть, но не удержан в персех китовых Иона: Твой бо образ нося, страдавшаго и погребению давшагося, яко от чертога от зверя изыде. Приглашаше же кустодии: хранящии суетная и ложная, милость сию оставили есте.
Ты, Честный владыко, патриаршеству Русскою Церковию суетно оставлену, от юности скорбен бысть, из глубины душевныя взываше: да преложится плач на радость православным людем, Патриарха вновь обретшим.
О, владыко Иларионе, предстоя собору мужей церковных, словом твоим, мудростию и благодатию растворенным, ты призва их свято патриаршее место в соборе Успенстем пусто не оставити.
Всечестная двоице, святый Тихоне, Патриарше и исповедниче, блаженный Иларионе, сподвижниче того и мучениче, образ вы Христа распята в мире сем явила еста.
Ангели и Архангели ныне на Небесех ликовствуют, видяще два земныя Ангела, Тихона и Илариона, Церковию прославляемая.
Богородичен: Радуйся, Царице Небесная, Церкве Столпе непоколебимый, патриархов православных похвало, обителей святых нерушимая стено, града нашего и страны утверждение.
Иларионе, священномучениче Христов, служителей грядущаго антихриста не убоялся еси, Христа мужески исповедал еси, за Церковь Божию живот твой положи, красо новомученик Российских, Руси Святыя похвало, ты Церкве нашея слава и утверждение.
От Божественныя мудрости твоея, Иларионе святый, исполни ум мой помраченный и страстный, яко да воспою житие твое, добродетели и подвиги твоя, с верными взывая: радуйся, молитвенниче наш преблагий, радуйся, богослове вдохновенный, радуйся, глубину таинства Церкве постигший, радуйся, в Церкви единой путь спасения возвестивший, радуйся, хитросплетения лукавых совопросников посрамивший, радуйся, еретики хищныя молниеносно победивший, радуйся, патриаршества крепкий защитниче, радуйся, отеческих заветов верный хранителю, радуйся, Христа истинное исповедание, радуйся, за Церковь жертвенное заколение. Радуйся, Иларионе, Церкве нашея славо и утверждение.
Ирмос: Неизреченное чудо, в пещи Избавивый преподобныя отроки из пламене, во гробе мертв бездыханен полагается, во спасение нас поющих: Избавителю Боже, благословен еси.
Аще бы не мужество твое, священномучениче Иларионе, множайшее язв и ран возложиша бо на Церковь Русскую еретики и гонители, звери хищныя. От тех избавивый нас, Боже, благословен еси.
Труды твоя, Иларионе, вкупе с Патриархом твоим Богомудрым Тихоном, милость Божию привлекоша и чудо неизреченное сотвориша: еретики яко дым исчезоша, и устави церковнии возстановлени быша, вернии же восклицаху: Боже, благословен еси.
Наставник бысть монахом обители Сретенския, Иларионе архипастырю, из тоя же ты еретики изгнавши, храм иконы Владимирския паки освятил еси. Тамо же и ныне иноцы взывают: Избавителю Боже, благословен еси.
Иларионе святый, обители Сретенския славо, сподоби нас, немощных и грешных, молитвами твоими от пламене страстей избавитися и от искушений невредимы сохранитися, Господеви взывающе: Боже, благословен еси.
Богородичен: Кто Тебе не прославит, Пресвятая Дево, Ты бо роса духовная, греховный пламень угашающая и верныя благодатию исполняющая, к Тебе Благословенней вопием: избави нас огня вечнаго осуждения и спаси души наша.
Ирмос: Ужаснися бояйся небо, и да подвижатся основания земли: се бо в мертвецех вменяется в Вышних Живый, и во гроб мал странноприемлется. Егоже, отроцы благословите, священницы воспойте, людие превозносите во вся веки.
Духу мира сего почесть не возда, Единаго Бога почитатель пребыл еси, Иларионе всеславне, ныне Владыке всех предстоиши. Егоже, отроцы, благословите, священницы, воспойте, людие, превозносите во вся веки.
Воистинну вся власть тьмы на Церковь Русскую ополчися: обаче ты, Иларионе, духом крепкий, сего не убоялся. Христа мученически исповедал еси. Мы же, молитвами твоими ограждаеми, Царя Небесе и земли славим. Егоже, отроцы, благословите, священницы, воспойте, людие, превозносите во вся веки.
О, священная и спасительная нощь Пасхи, егда ты, святителю Христов, во узах Соловецких возгласи: да воскреснет Бог! Егоже, отроцы, благословите, священницы, воспойте, людие, превозносите во вся веки.
О, земле Соловецкая, возрадуйся ныне и возвеселися: слава бо твоя, Иларион предивный с сонмом новомучеников, на небесех за Русь Святую молит ныне Царя Славы. Егоже, отроцы, благословите, священницы, воспойте, людие, превозносите во вся веки.
Богородичен: Пресвятая Дево, на Небеса к Сыну Твоему взошла еси и скорбныя земли не оставила еси. Покрый честным Твоим омофором обители и грады наша, жизнь вечную подающи всем воспевающим Тя.
Ирмос: Не рыдай Мене, Мати, зрящи во гробе, Егоже во чреве без семени зачала еси, Сына: востану бо и прославлюся, и вознесу со славою непрестанно, яко Бог, верою и любовию Тя величающия.
Егда во врачебнице темничней Петрова града огневицею тело твое палимо бе, душа твоя яко на водах упокоения, радостию исполнися, сетей князя мира сего избегнув, и ко Христу отходя.
Иларионе славне, ты Христа небоязненно исповедал еси, мучения за Него претерпел еси и кончины блаженныя сподобился еси. Темже и мы к тебе взываем: моли Милостивнаго Бога, да подаст и нам преставление безболезненно и живот вечный.
Ангельское пение и благовест пасхальный слышаша друзи твои и сродницы, егда душа твоя, Иларионе, чистая на небо восход совершаше.
Тело твое многоболезненное во гробе узреша, чада твоя духовная возрыдаша, и к тебе взываху: молися о нас, праведниче, у Престола Господня.
Богородичен: Мати Безневестная, не лиши нас Твоего заступления, умоли Милосерднаго Судию оправдати ны, верою и любовию Тя величающих.
Вси святии Церкве Русския ныне радостно торжествуют, священномученика и архиерея Илариона зряще Троице Божественней молитвенно предстоящаго.
Пресвятая Богородице, Красное Селение Бога и Слова, помози нам, Милостивая, молитвами Твоими терпение и упование стяжати, и спасение улучити.
Не отвергл ли Бог премудрость мира сего; тебе же дарована бысть мудрость крестная и благодатная, во след отцем следовати и истину Церкве возвещати. Учителю истиннаго богословия, просвети наша помраченныя душы, в разуме церковнем утверждая.
На судилищи безбожнем стоя, Христа мужески исповедал еси, Иларионе священномучениче, мы же посреде падшаго мира пребываем во гресех: помози нам веку сему не сообразоватися, но жизнию своею Христа исповедати, да не посрамлени будем на Судище Божием.
Леностию, унынием и разслаблением от диавола борими, к тебе Иларионе, взываем: моли, владыко, Щедраго Бога, да подаст Он нам благодатныя силы Ему усердно работати и Церкви Святей неустанно служити, якоже ты неусыпно трудился еси ради блага церковнаго.
На Крест Христов взирая, распялся еси, Иларионе, миру, оскорбления и болезни в терпении понесл еси: укрепи и ны на пути крестнем, во еже миру в нас распяту быти, и моли Христа Бога сердца наша любовию к Нему просветити.
Сердце очистив подвигом, блага мира сего презирая, Христа пред безбожники исповедав и Его ради пострадав, благодать Святаго Духа стяжал еси, Иларионе священномучениче. Темже имый дерзновение ко Христу Богу, моли Того спастися душам нашим.
Богородице, Ты еси Троическаго Совета Таинница, сподоби и ны Троицу Святую в житии настоящем прославити, и светом Трисиятельным осияни стати, и жизни вечныя приобщитися.
Блаженны от канона, песни 3-я и 6-я. Прокимен, глас 1: Уста моя возглаголют премудрость, и поучение сердца моего разум. Стих: Блажен муж, емуже не вменит Господь греха. Апостол ко Евреем, зачало 318. Аллилуиа, глас 1: Терпя потерпех Господа, и внят ми, и услыша молитву мою. Стих: Мужайтеся, и да крепится сердце ваше, вси уповающии на Господа. Евангелие от Иоанна, зачало 36. Причастен: В память вечную будет праведник, от слуха зла не убоится.
О великий угодниче Божий и преславный чудотворче, святителю Иларионе! От дальних и ближних градов и весей сошедшеся, во еже на месте подвигов твоих помолитися и многоцелебныя мощи твоя облобызати, из глубины сердца взываем к тебе: жезлом благости, якоже пастырь добрый, упаси заблуждшыя овцы стада Христова, во дворы Господни сия всели, огради нас от соблазна, ересей и расколов, научи во странствии суших горняя мудрствовати: разсеянный ум наш просвети и на путь истины направи, охладевшее сердце согрей любовию ко ближнему и ревностию ко исполнению велений Божиих, грехом и нерадением ослабленную волю нашу оживотвори благодатию Духа Всесвятаго: да твоему пастырскому гласу последующе, сохраним в чистоте и правде души наша, и тако, Богу помогающу, Небеснаго Царствия достигнем, идеже купно с тобою воспрославим пречестное и великолепое имя Отца и Сына и Духа Святаго во веки веков. Аминь.