Икона Пресвятой Богородицы, именуемая “Муромской”

(память 12 апреля по старому стилю)

Согласно церковному преданию, Муромская икона Божией Матери была принесена из Киева в Муром святым благоверным князем Константином Муромским в начале XII века. Благодатная сила, исходившая от святого образа, помогла князю обратить язычников Муромского княжества в христианство. Вначале проповедь его не встретила сочувствия, нашлись даже такие закоренелые язычники, которые составили заговор и поклялись или убить своего князя, или выгнать его из Мурома. Когда святой Константин узнал об этом, то усердно помолился Богу, взял образ Богоматери и вышел с ним к заговорщикам, твердо надеясь на заступничество Царицы Небесной. Язычники, увидев икону, были поражены ужасом, просили у князя прощения и здесь же дали согласие на крещение в святую православную веру.

Муромская икона прославилась и другими чудесами, из которых наиболее замечательно следующее. В конце XII века епископом в Муроме был святитель Василий, муж праведный и благочестивый. Однажды по дьявольскому навету святитель подвергся несправедливому подозрению в жизни, не соответствующей высокому епископскому сану. За это озлобленные муромцы решили изгнать его из города. Узнав об этом, святитель целую ночь провел в молитве, а утром отправился в храм Благовещения и там перед чудотворным образом Пресвятой Богородицы отслужил молебен. Возложив надежду спасения своего на Царицу Небесную, святитель Василий взял Ее чудотворную икону и пошел с нею к реке Оке, где для него приготовили суденышко. Здесь он снял с себя мантию, распростер ее по воде и стал на нее с образом Богоматери. Вдруг поднялся сильный ветер и понес святителя против течения...

Через шесть часов епископ прибыл в Старую Рязань. Впоследствии он перенес епископскую кафедру в Новую Рязань (Переяславль Рязанский). Туда же была перенесена и чудотворная икона Божией Матери. В честь этого чуда Муромская икона иногда именуется “Моление святого Василия”. В древности она находилась в Рязанском Рождественском (Успенском) соборе.

Помимо “Повести о рязанском епископе Василие” самым ранним документом, в котором упоминается Муромская икона Божией Матери, является опись старого Успенского собора в Рязани, составленная в 1638 году. В ней мы читаем: “Над гробницею (Василия) образ Пречистыя Богородицы Умиления, и тот образ моления Василия епископа Муромского и Рязанского”.

Первоначально празднование иконе совершалось во вторую неделю Петрова поста, потом было перенесено на Фомину неделю. Наконец, в 1814 году Св. Синод установил праздновать иконе 12 апреля.

В 1829 году список чудотворной иконы находился в Муромском соборе Рождества Богородицы. “По правую сторону святых мощей (благоверных князя Петра и княгини Февронии), на одной из четырех колонн храма, находится весьма чтимая святыня — икона Муромской Божией Матери. Эта икона вставлена в другой большой образ “Всех святых” — читаем в описании Богородицкого собора, составленном В.Н. Добрынкиным.

2 июля 1918 года чудотворный образ Божией Матери прибыл в Муром. Ее сопровождали Рязанский архиепископ Иоанн, духовенство Кафедрального Рождественского собора и рязанские хоругвеносцы. Икона была принесена в Муром с разрешения Церковного Собора “для обхождения по церквам и домам”. Образ находился в Муроме до 19 августа.

Иконография Муромской иконы Божией Матери близка к Яхромской и Ярославской иконам. По мнению Н.П. Кондакова, источники такого изображения можно найти в поздневизантийской и итальянской живописи.

Акафист Пресвятой Богородице перед Ея иконой, именуемой “Муромская”

Кондак 1

Избранной от всех родов Царице и Владычице мира, милостию своею страну сию озаряющей, похвальное пение приносим Ти, Богородице, Ты же, яко имущая дерзновение к Сыну Твоему и Богу, от всяких нас бед свободи, да зовем Ти: Радуйся, Пречудная Владычице, земли Муромския и Рязанския милостивая Заступнице.

Икос 1

Архангела глас усты недостойными приносим Ти, чистая, яко благоизволила еси даровати сию чудотворную икону Твою князю Святославу, да преподаст ю в благословение сыну своему Константину; таково от лет древних пребысть благословение Твое и милость Твоя на стране нашей и икона Твоя бысть нам выну в знамение Твоего Покрова неотступнаго и в присное нам утешение и радование. Благодаряще убо Тя, с веселием зовем Тебе: Радуйся, от ангелов воспеваемая и от всего мира славимая; Радуйся, херувим честнейшая и серафим без сравнения славнейшая; Радуйся, небесных сил превысшая и ангельския силы превосходящая; Радуйся, в честней иконе Твоей от всех родов покланяемая; Радуйся, присноблаженная, граду Мурому похвало; Радуйся, преблагословенная, Рязани украшение. Радуйся, пречудная Владычице, земли Муромския и Рязанския милостивая Заступнице.

Кондак 2

Видя о себе Божие смотрение, да просветит жители града Мурома, благоверный князь Константин, со священники и вои, в страну Муромскую отыде, взем честный образ Твой, Владычице, и всю надежду на Тя и Бога возложив, Ему же и пояше: Аллилуиа.

Икос 2

Разумети неотступный покров Твой и всесильную помощь Твою даровала еси, Пречистая, благоверному князю, того ради, аще и яростию сретоша его непокоривии иноплеменницы и сына его убиша, обаче никакоже смутися, ниже от намерения своего отступи, но в град Муром вниде и на княжении своем утвердися, благодарне воспевая Тебе: Радуйся, пришествием святыя иконы Твоея град Муром озарившая; Радуйся, милостивым ликом Твоим сердца неверных умягчившая; Радуйся, верным людем Твоим всесильную помощь Твою во брани явившая; Радуйся, иноплеменники, во ожесточении сущия, вразумити изволившая; Радуйся, противныя советы их сокрушившая; Радуйся, к свету веры Христовой тыя наставившая. Радуйся, Пречудная Владычице, земли Муромския и Рязанския милостивая Заступнице.

Кондак 3

Силою Вышняго утвердися благоверный князь Константин во граде Муроме, и неизреченное милосердие и заступление Твое, Всемилостивая, поминая, абие воздвиже церковь Тебе в честь Благовещения Твоего, идеже и икону святую твою благолепне постави, со умилением вопия Богу: Аллилуиа.

Икос 3

Имея Тя Богоизбранную помощницу во апостольстем подвизе своем, благоверный Константин никакоже устрашися, егда невернии идолослужителие со оружием и воплем великим приидоша к нему, умертвити его помышляюще, но чудную икону Твою на руки взем, един к ним изыде. Темже приснодевственный лик Твой зряще, вострепеташа нечестивии и падоша ниц, аки мертви, вернии же людие Твои, сему преславному знамению дивляшеся, воспевают Ти сице: Радуйся, вернаго раба Твоего от нечестивых оградившая; Радуйся, бесовскую лесть тем обличившая; Радуйся, радость небеси и земли тогда явившая; Радуйся, людей безбожных и заблудших дивное вразумление; Радуйся, стаду Твоему покрове и присное утешение; Радуйся, пристанище наше тихое и всегда готовое заступление. Радуйся, Пречудная Владычице, земли Муромския и Рязанския милостивая Заступнице.

Кондак 4

Бурю злобы и ярости безумныя утишила еси, Всеблагая, и в разум истины привела еси тогда нечестивыя, видевше бо святую икону Твою, аки солнце сияющую, лице же князя, аки ангельское, смиришася зело и, со страхом приступающе к нему, крещения просяху, да Богу единому научатся пети: Аллилуиа.

Икос 4

Слышав сицевыя глаголы и моления прежде темных, ныне же света Христова взыскующих людей, благоверный князь умилися и, со всем освященным собором образу Твоему представ, возде руце свои на небо и рече: о Всепетая Госпоже Богородице, благодарим Тя, яко избавила еси нас от нахождения рати сих иноплеменников и прежде злыя враги внезапу вожделенныя нам братия и други сотворила еси; темже и по сих во время всякия скорби нашея и обстояний не забуди нас, теплая Заступнице, да со умилением присно вопием Тебе: Радуйся, свече, свет невечерний возсиявшая и неверныя ко Христу приведшая; Радуйся, сердца их во мгновение к восприятию истины приуготовившая; Радуйся, восстание иноплеменник и их противление дивно смирившая; Радуйся, злое намерение их во благое преложившая; Радуйся, погибающих скорое взыскание; Радуйся, всем хотящим спастися дивная помощнице. Радуйся, Пречудная Владычице, земли Муромския и Рязанския милостивая Заступнице.

Кондак 5

Бога истиннаго познавше и заповедем Его научившеся, люди муромстии единомысленне ко святей купели устремишася и с веселием крещахуся, баню возрождения восприемлюще, Отцу же и Сыну и Святому Духу вопиюще: Аллилуиа.

Икос 5

Видевше лучу пресветлую, новопросвещенныя людие абие по крещении с высоты осенившую, и гром с небесе внезапу возгремевший слышаще, устрашися и вкупе возрадовася благоверный князь Константин и вси приснии с ним; разумеша бо, яко близ еси их и новопросвещенныя люди Твоя покрываеши. Темже со страхом и радостию вопияху Тебе: Радуйся, доме, его же созда Себе Премудрость Божия; Радуйся, жезле Иессеов, от негоже прозябе цвет Христов; Радуйся, Невесто неневестная, от Духа Свята заченшая Сына Эммануила; Радуйся, клеще таинственная, угль Божества во чреве приемшая. Радуйся, престоле превознесенный, на немже плотию возседе Сын Божий; Радуйся, врата затворенная, имиже пройде един Христос. Радуйся, Пречудная Владычице, земли Муромския и Рязанския милостивая Заступнице.

Кондак 6

Проповедует вся страна Российская чудеса, от святыя иконы Твоея бываемая, и прославляет Тя, яко благую Одигитрию, истинный путь к Царствию Небесному всем верным указующую; сего ради и мы со умилением припадаем к Тебе, Владычице, и богатыя Твоя милости исповедающе, Сыну Твоему и Богу из глубины души воспеваем: Аллилуиа.

Икос 6

Возсия во граде Муроме свет веры православныя твоим благоволением, Пречистая, и милостию Сына Твоего и Бога и истиное благочестие оттоле зде утвердися. Сего ради и в благодарную память чудесе Твоего новый храм благолепнейший сей из камене тогда воздвигоша Тебе, в немже даже и до ныне сходящеся вернии людие твои не престают звати Тебе: Радуйся, во храме Божии воспитанная и Сама храм святый Тому бывшая; Радуйся, благодатию Его предочищенная и нам во спасение предызбранная; Радуйся, всеми добродетельми преукрашенная; Радуйся, яко палата пресветлая, Владыце уготованная; Радуйся, Невесто миру Создателя, земному здателю на хранение врученная; Радуйся, горних сил похвало и земнородных всех славо; Радуйся, Пречудная Владычице, земли Муромския и Рязанския милостивая Заступнице.

Кондак 7

Хотяще от вечныя пагубы избавити люди муромския, древле светом веры просветила еси, Всенепорочная, благопоспеши убо, Владычице, Твоею небесною помощию и нам в просвещение ума и сердца нашего и даждь нам до конца жития нашего бодренно наше спасение соделати, да не когда уснем в смерть, но да сподобимся в горнем Царствии вечно с тобою воспевати Богу: Аллилуиа.

Икос 7

Новое знамение Твоего о граде Муроме благаго промышления явила еси, Владычице, егда во дни святителя Василия злыя козни диавольския яве посрамила еси и прельщенных людей сердца покаянием умилила еси. Темже неповинное изгнание и срамоту хулений от паствы своея Христа ради сладце претерпевая, святитель Божий правды своея от Тебе ожидаше и Пречистому Твоему образу усердно покланяяся, вопияше: Радуйся, изгнанные правды ради милосердная Заступнице; Радуйся, поносимых за Христа пристанище благоутишное; Радуйся, ризою Твоею от всякого зла нас покрывающая; Радуйся, прельстившихся врача советом скорое вразумление; Радуйся, правды Божия дивное явление; Радуйся, козней диавольских конечное посрамление. Радуйся, Пречудная Владычице, земли Муромския и Рязанския милостивая Заступнице.

Кондак 8

Странное мыслем человеческим совершися промышлением Твоим, Пречистая, егда святитель Василий от града Мурома исхождаше, чудотворную бо икону Твою на руку держа, на мантию свою, аки на корабль, возступи и по волнам речным устремися, во умилении сердца поя Богу: Аллилуиа.

Икос 8

Весь град Муром во ужасе потрясеся, необычное плавание своего изгоняемаго пастыря виде; тако бо обличеся ложь оклеветающих его, того же праведное житие. Темже люди муромстии, временно прельщение свое окаявающе, Твое же дивное промышление славяще, воспеваху Тебе: Радуйся, Преблагословенная Мати Творца Твоего и Господа; Радуйся, смирением возвышенная и на смиренныя призирающая; Радуйся, верныя рабы Твоя николиже оставляющая; Радуйся, и во изгнании с теми сущая; Радуйся, по скорби тем утешение подающая; Радуйся, радость миру вечную рождшая. Радуйся, Пречудная Владычице, земли Муромския и Рязанския милостивая Заступнице.

Кондак 9

Вся козни вражия посрамлены тобою, Пречистая, видя и о вразумлении прельщенных людей своих тепле моляся, святитель Василий от очию их скрыся и к новому месту селения своего и подвигов плывяше, поя Богу: Аллилуиа.

Икос 9

Ветий многовещаннии языцы не возмогут изъяснити новаго чудесе Твоего, имже угодника Твоего удивила еси, Владычице, необычным путем от града Мурома во Рязань преселивши. Мы же, святую икону Твою обстояще и дивное промышление Твое воспевающе, не престанем таковаго чудесе память творити и со умилением присно взывати Тебе: Радуйся, град Рязань пришествием иконы Твоея возвеселившая; Радуйся, милостивым предстательством Твоим и Муром не оставившая; Радуйся, Образом Твоим струи водныя освятившая; Радуйся, дивным отшествием святителя люди Муромския вразумившая; Радуйся, к сокрушению о гресех и к покаянию тех обратившая; Радуйся, из глубины греховныя и нас воздвизающая. Радуйся, Пречудная Владычице, земли Муромския и Рязанския милостивая Заступнице.

Кондак 10

Спасение наше устрояя, не престал еси, Блаже, дивными знаменьми и чудесы прославляти Всесвятую Матерь Твою Пренепорочную, юже приими ныне за ны молящуюся и богатыя милости Твоя нам низпосли, с любовию вопиющим Тебе: Аллилуиа.

Икос 10

Стена необоримая и пристанище небурное Ты еси, Богородице Пречистая, всем притекающим к Тебе, темже огради и нас и покрый от всех враг видимых и невидимых, да с верою покланяющеся пречестней и Цельбоносней иконе Твоей, радостно вопием Тебе: Радуйся, сохраняти и спасати всех призывающих Тя обещавшая; Радуйся, к Сыну Твоему и Богу молитвы верных приносящая; Радуйся, и Сама непрестанно у престола Его молящаяся о нас; Радуйся, Благодать Твою иконам Твоим даровавшая; Радуйся, всю вселенную лучами тоя озаряющая; Радуйся, рода христианскаго похвало н непостыдное упование. Радуйся, Пречудная Владычице, земли Муромския и Рязанския милостивая Заступнице.

Кондак 11

Пение всякое побеждается и недоумеет язык благохвалити Тя по достоянию, Пренепорочная Владычице, множества ради чудес, яже от святых икон Твоих присно источаеши. Обаче дерзаем и мы, грешнии и смиреннии, свой глас принести Тебе, Всемилостивая Мати, наше усердие приими, Сыну бо Твоему поем: Аллилуиа.

Икос 11

Светозарная свеща, во граде Муроме возсиявшая и град Рязань просвещающая, явися предивная икона Твоя, Владычице; всем бо притекающим к ней струи исцелений изливает и чудес зарями люди Твоя веселит, вся подвизающе звати Тебе: Радуйся, Божественный свет неизреченно родившая; Радуйся, тьму смертную Рождеством Твоим просветившая; Радуйся, страны нашея неусыпная Покровительнице; Радуйся, людей православных верная Хранительнице; Радуйся, радости небесныя всем нам Ходатаице; Радуйся, при исходе нашем от телесе благая Споручнице. Радуйся, Премудная Владычице, земли Муромския и Рязанския милостивая Заступнице.

Кондак 12

Благодать спасительную Тобою улучивше, не престаем милости Твоя проповедати, Богоблаженная; скорбящим бо утешение, недужным исцеление, от духов нечистых стужаемым освобождение присно подаеши и всем всяку язву врачуеши, да благодарным сердцем Богу вопием: Аллилуиа.

Икос 12

Поюще Твоя многая и преславная роду человеческому благодеяния, немолчными песньми воспеваем Тя, Предивная Царице небеси и земли; Тя во едину нашу надежду и помощь полагаем и тобою, недостойнии, к Сыну Твоему и Богу дерзновение имамы. Темже услыши нас, Владычице, и обычную благодать Твою нам низпосли, с любовию вопиющим Тебе: Радуйся, милостей Сына Твоего и Бога нас сподобляющая; Радуйся, десную часть молитвами твоими нам грешным управляющая; Радуйся, стадо Твое в жизнь земную нетрудно преводящая; Радуйся, и грешником кающимся спасение подающая; Радуйся, Церкве Православныя нерушимая стено; Радуйся, рода христианскаго удобрение. Радуйся, Пречудная Владычице, земли Муромския и Рязанския милостивая Заступнице.

Кондак 13

О, всепетая Мати, Всемилостивая Госпоже, Присноблаженная Царице, приими от нас, недостойных, малое сие моление, пред пречистым твоим образом со слезами приносимое, и якоже древле прельщенныя вразумила еси и кающияся помиловала еси, тако и ныне тьму греховную в сердцах наших просвети, бурю страстей умири, вся раздоры и нестроения утоли и от бед избави всех, поющих Богу: Аллилуиа.

(Этот кондак читается трижды, затем икос 1 и кондак 1)

Молитва к Пресвятой Богородице перед Ея иконой, именуемой “Муромская”

О, Пресвятая Дево, Мати Господа вышних Сил, небеси и земли Царице, града и страны нашея всемощная Заступнице! Услыши нас, молящихся Тебе, и испроси у Бога Сына Твоего пастырем нашим ревность и бдение о душах, градоправителем мудрость и силу, судиям правду и нелицеприятие, наставником разум и смиренномудрие, супругом любовь и согласие, чадом послушание, обидимым терпение, обидящим страх Божий, скорбящим благодушие, радующимся воздержание, нам же всем низпосли дух разума и Благочестия, дух милосердия и кротости, дух чистоты и правды. Ей, Госпоже Пречистая! Умилосердися на немощныя люди Твоя: разсеянныя собери, заблудшия на путь правый настави, недугующия уврачуй, старость поддержи, юныя уцеломудри, младенцы воспитай и призри на всех нас призрением милостиваго Твоего заступления. Милостива нам буди зде и на Страшнем Суде Сына Твоего. Ты бо еси, Госпоже, слава небесных и упование земных, ты по Бозе наша надежда и Заступница всех притекающих к Тебе с верою. Тебе убо молимся и Тебе, яко всемогущей Помощнице, сами себе и друг друга и всю жизнь нашу предаем, ныне и присно и во веки веков. Аминь.

Тропарь Пресвятой Богородице перед Ея иконой, именуемой “Муромская”

Тропарь, глас 4

Днесь светло красуется град Муром, яко зарю солнечную восприемши Владычице, чудотворную Твою икону, к ней же ныне мы притекающе и молящеся Тебе взываем сице: о, Пречудная Владычице Богородице, молися из Тебе воплощенному Христу Богу нашему, да избавит град сей и вся грады и страны христианския невредимы от всех навет вражиих, и спасет души наша, яко милосерд!