Уставные заметки - Служба святителю Павлу Тобольскому

Великобденная служба великому защитнику Святой Церкви, митрополиту Тобольскому Павлу (Конюскевичу), публикуется (текстовым перенабором гражданской азбукой) по «Печерской Минее» (т. I, стр. 128 – 143).

Святителю всечестне, поборниче Церкве Христовы, Павле богоглаголиве, милостивно преклоняешися к ищущим твоего заступления, приходящим с верою к раце святых мощей твоих, дары целебныя подаеши независтно: тя бо заступника и предстателя и целителя, вернии обретохом.
Святителю преблаженне, светлая красото Церкве Христовы, Павле богомудре, добродетельми высокими, яко лествицею небовосходною, востекл еси к Богу, прияти твоего исповедания почесть победную, нам же оставил еси в наследие тело твое нетленное, источати исцеления и прогонити духи нечистыя от человек: темже блажим тя, чудотворче предивный.
Святителю достохвальне, столпе непоколебимый Церкве Христовы, Павле богоносне, постническим житием от юности украсився, в Лавре Печерстей Богу обручился еси, иночествовати усердно, тамо же и покой о Христе обрел еси, в небеса вселився чистою душею твоею, тело твое нетленное в благословение нам оставил еси, источати чудеса: темже хвалим тя, чудотворче предивный.
Возсия лучами многих чудес память твоя, святителю Павле, верных сердца озаряющи богоразумия светом, юже совершающе светло, тебе, пастырю добрый Христова стада, хвалебно взываем: радуйся, исповедниче непостыдный, о правде свидетельствовавый нелицеприятно: радуйся, нестяжателю истинный, не свое, а церковное достояние хранивый: радуйся, архиереев украшение и монахов похвало: Христа Бога моли, спастися душам нашим.
Дом добродетелей, / вместилище смиренномудрия, / сосуд Божия благодати, / явился еси, / святителю Павле приснопамятне.
Стих: Священницы Твои облекутся в правду, и преподобнии Твои возрадуются.
Дома Божия страже, / волков душегубительных отгонителю, / благочестия учителю, / показался еси, / святителю Павле богоугодне.
Стих: Уста праведнаго поучатся премудрости, и язык его возглаголет суд.
Дома Владычицы Богородицы, / небеси подобныя церкве Печерския, / благодатное украшение, гроб твой нарицаем, / целебныя струи источаяй от него, / святителю Павле чудодейственне.
В мале быв верен, святителю, над многими превознеслся еси Божиею благодатию, обильно тебе дарованною, исцеляеши души верою притекающих к тебе, яко воистинну великий таинник Святыя Троицы.
Православия наставниче, Церкве Христовы поборниче, правды нелицеприятный провозвестниче, архиереов богодухновенное удобрение, Павле чудотворче, высотою исповедания твоего вся ны удивляеши, чудесы же твоими благодатно просвещаеши: подвижниче духовный, моли Христа Бога спастися душам нашим.
Яко звезда многосветлая, святителю Христов, небо Церкве Русския озарил еси, исповедания доблестию, нетлением мощей твоих и многими чудесы: во тме века сего, велию светлость благочестия возсияваеши, досточудне, и вся ны приводиши блажити тя по достоянию, и верою совершати святую и пречестную память твою.
Яко источник многоцелебный и река многоводная чудес, святителю Христов, Лавру Печерскую орошаеши к плодоношению духовному: в ней бо чудным нетлением мощей твоих прославился еси, богоприятне, и от них многая исцеления недужным даровал еси: темже любовию совершаем святую и пречестную память твою.
Яко скорбных утешитель и недугующих врач безмездный, святителю Христов, приходящих к честному твоему гробу, милостивно приемлеши и дары благодатныя обильно подаеши всем, требующим твоего заступления, чудотворче благий: темже пении хвалебными почитаем святую и пречестную память твою.
Апостолов преемниче, Златоуста подражателю, изгнание от престола твоего правды ради претерпел еси, отче Павле, дивимся мужеству души твоея и ревности о Церкви Христовей: не наемник бо был еси, но пастырь истинен, душу свою полагаяй за овцы своя: темже тя почитаем и ублажаем, досточудне.
Приидите, вернии, ублажим святителя и чудотворца Павла, в последняя наша лета доблестию исповедания просиявшаго, и чудесы многими от Господа прославленнаго: в ризу бо нетления свыше облечеся, и целебныя дары источает от мощей своих святых. Духовне красуйся, Лавро Печерская, стяжавши в себе таковаго светильника, истиннаго Христова угодника, молитвами своими подающаго миру велию милость.
Имея дерзновение ко Господу, святителю отче наш Павле, проси отечествию твоему умирения, пастве твоей благоустроения, Лавре Печерстей, тобою возлюбленней, благодатнаго преуспеяния, и всем нам, любовию чтущим тя, мирнаго богоугоднаго жития и велия милости.
Во всю землю Русскую изыде слава чудес твоих, святителю Павле, егда мощи твоя, благоволением Вседержителя Бога, нетленни обретошася: по мнозех бо летех, во гробе лежащу ти, тление не дерзну прикоснутися твоей плоти, ниже самим одеждом твоим, преподобне, тако прославльшу тя Христу Богу, у Негоже проси нам мира и велия милости.
Пастырю предобрый, столпе и красото Русския Церкве, Павле достохвальне, ты священники освящал еси, заблуждшия исправлял еси, обидимых был еси предстатель, вдов и сирот прибежище, и всей пастве твоей благочестия учитель: темже хвалим тя, и молимтися прилежно: моли Христа Бога спасти души наша.
Киими достойными похвалами / ублажим святителя Павла, / новаго исповедника Церкве Русския / и предивнаго чудотворца, / нетления прозябение прекрасное / и молитвенника богоприятнаго, / егоже небесными молитвами, / Христос Бог, благоуветлив нам бывает, / и дарует велию милость.
Стих: Честна пред Господем / смерть преподобных Его.
Киими песненными добротами / прославим святителя Павла? / Егоже слава не от человек, но от Бога / назнаменася нетлением и чудесы, / источника исцелений благодатных, / милости подателя / и скорбных утешителя любвеобильнаго, / молящася непрестанно у престола Христа Бога, / даровати нам от врагов избавление, / и велию милость.
Стих: Праведник яко финикс процветет, / и яко кедр иже в Ливане умножится.
Киими победными венцы / увязем святителя Павла? / Добраго воина Христова, / не убоявшася гневавшихся неправедно о правде Божией, / и противуставша нарушителем правил Святыя Церкве, / еяже достояние охраняя, / изгнание от престола святительскаго радостно прият: / того молитвами, Христе Боже, / даруй Церкви Твоей мир и велию милость.
Святителю всечестне, правило веры истинныя, образе мужества высокаго, отче наш Павле, постническим житием благоукрасився, к лику преподобных Печерских сопричелся еси: с нимиже престолу Владычню предстоя, моли Христа Бога, даровати нам прегрешений прощение, и душам нашим мир и велию милость.
Яко украшение драгое, имать тя Лавра Печерская, святителю Павле: в ней бо сокровище нетленных мощей твоих хранимо есть, от нихже исцеления преславно источаеши, яко таинник Божия благодати. (Дважды)

Слава, и ныне, Богородичен:

Всех Творца и Владыку, Бога же и Содетеля, Всенепорочная Чистая, Духом Божественным в ложеснах заченши, нетленно родила еси: Егоже славяще, Тя величаем, Дево, яко палату всех Царя, и мира защищение.
Столп непоколебим правил церковных был еси, святителю Павле приснопамятне, егоже ветри суемудрия человеческаго поколебати не возмогоша: темже ныне богатство некрадомо исцелений явися гроб твой, блаженне, молитвенниче о душах наших. (Дважды)

Слава, и ныне, Богородичен:

Радуйся, златокованная чаше, Пречистая Дево, в нейже вино спасительное от Духа Святаго нам растворися, егоже пиющии ктому не умирают: безсмертия бо виновное Слово родила еси, на радость нам вечную.
Воздержанием от юности твоея плоть духу покорил еси, отче, монах истинен был еси нелицемерно, и просветився богомудрия учением, святительства одеждею достойно украсился еси, Павле богоносне: ныне со святители Престолу предстоя Христову, молися о душах наших. (Дважды)

Слава, и ныне, Богородичен:

От любве душевныя вопию Ти, Владычице, молением богоугоднаго святителя Павла, в обители Твоей Печерстей чудесы просиявшаго, преклонися на милость ко мне недостойному: молитву приими, Всеблагая, со смирением Тебе приносимую от болезненныя души, и буди ми здравие и спасение.
Прокимен: Честна пред Господем смерть преподобных Его. Стих: Что воздам Господеви о всех, яже воздаде ми?
Божественная благодать осеняет гроб твой, святителю отче наш Павле, и действует во спасение приходящих к тебе с верою: яко болящия исцеляеши, разслабленныя укрепляеши, слепыя просвещаеши и бесы от человек прогоняеши, чудес изливаеши прикасающимся мощем твоим святым: темже тя, целебниче безмездный, почитаем и ублажаем.
Ирмос: Яко по суху пешешествовав Израиль, по бездне стопами, гонителя фараона видя потопляема, Богу победную песнь поим, вопияше.
Приими, святче Божий, пение хвалебное, от истиннаго усердия тебе приносимое, и простри молитвенныя длани твоя ко Господу, прося нам осияния благодатнаго свыше: да твое богоугодное житие верно прославим, Богу, в тебе прославльшемуся, победную песнь воспевая.
От юности твоея, отче Павле, постническое житие возлюбил еси, учении богодухновенными просветив твой смысл, соделался еси сосуд избран Божия благодати, яже тя возвыси на степень святительскую, яко достойнаго Богу победную песнь воспевати.
Юношеския страсти обуздав воздержанием, в Лавре Печерстей благий ярем Христов на рамо твое возложил еси, Павле преподобне, инок быв нелицемерен, во смирении духа Богу победную песнь воспевавый.
Богородичен: Царя Небеснаго, на Херувимех седящаго, и Серафимы повелевающаго, престол явилася еси, Богородице: к Немуже дерзновение Матернее имеющи, проси нам у Его благости, грехов прощения и жития исправления: да тебе благодарное пение воспеваем.
Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.
Естества человеческаго немощь познавая, молитвами непрестанными к Богу, силу свыше приял еси, подвиги духовныя непреткновенно проходити, на камени веры утвердив, отче Павле, твое боголюбивое сердце.
Разум твой богословием православныя веры украсил еси, Павле богоносе, соименному ти апостолу Христову внимая с любовию, и того учения полагая яко правило жизни, достигл еси исполнения духовнаго, в Бозе утвердив твоя помышления.
К источнику сладостному Евангельскаго учения, яко елень на источники водныя, потекл еси, Павле богомудре, и яко древо, при водах возрасшее, плод мног о Христе принесл еси Святей Церкви, яже есть столп и утверждение истины.
Богородичен: Во многия и лютыя беззакония впадшия ны, Владычице Преблагая, избави от плена страстей, и в страну безстрастия приведи, рукою Твоею державною, утвердив наша сердца на камени заповедей Сына Твоего и Бога.
Помышляя тя, святителю, в чертозе небеснем Царя, Христа и Бога, славою и честию увенчаннаго, уязвляюся сердцем, тоя же доброты желающи: но увы мне окаянному, чуждому дел твоего жития благаго, недостойному спасения вечнаго, ты сам, преблагий отче, воззри на мя погибающаго, и руку помощи твоея мне простри: богатствы твоими восполни мою душевную скудость, и покажи мя наследника Царства Христова. (Дважды)
Связан многими ныне пленицами грехов, и содержимь лютыми страстьми и бедами, к Тебе прибегаю моему спасению и вопию: помози ми, Дево, Мати Божия.
Ирмос: Христос моя сила, Бог и Господь, честная Церковь боголепно поет, взывающи от смысла чиста, о Господе празднующи.
Истинный раб Христа Спасителя был еси, святителю богоблаженне: на Того бо выну взирая умныма очесы сердца, жизнь твою в заповедех Его совершил еси, смыслом чистым испытуя тайны, в Законе Божием сокровенныя, и достойным открываемыя от Господа.
Преподобием и чистотою украсився измлада, святителю Павле, на престоле архиерейстем поставился еси от Пастыреначальника Иисуса, яко светильник горяй и светяй: молитвами твоими, святе, освети и наша мрачныя души, да помощию твоею узрим свет спасения о Господе.
От юга России возрасл еси, отче, яко ветвь благоплодная, и в северную Сибирскую страну послан был еси пасти стадо Христово: Тобольская всеосвященная Церковь тя пастыря добраго стяжа, поборника и защитника ея достояния.
Богородичен: В Тебе, Чистая, исповедуем во дву естеству быти, во едино прекрасно соединившияся спасения ради нашего: Того моли, Благодатная, разделенныя ны грехопаденми от Его благодати, паки соединити с Собою таинствами Святыя Церкве.
Ирмос: Божиим светом Твоим, Блаже, утренюющих Ти души любовию озари, молюся: Тя ведети, Слове Божий, истиннаго Бога, от мрака греховнаго взывающа.
От истинныя любве к Богу и Его Святей Церкви, святителю Павле, не терпел еси взятия церковнаго достояния, но сему мужески противустал еси, изгнание от престола твоего претерпев, яко воистинну исповедник правды Божия.
Разумевши от видения свыше, твоего подвига правость, благоверная Царица, по желанию твоему, святителю Павле, в Лавру Печерскую жительствовати тя посылает: да идеже пострижен был еси во иночество, тамо скончаеши живот твой в подвизех поста и молитвы.
Нищету духовную возлюбив, отче богомудре, злато, Царицею тебе посланное, прияти не восхотел еси, дондеже не бысть оно назначено на благую потребу Лавры Печерския, в нейже паче злата дражайшия, чествуем ныне твоя многоцелебныя мощи.
Богородичен: Изумевает всяк ум человеческий, Твоего приснодевства велию тайну постигнути, Богородице, како в рождестве, и по рождестве, девство сохранила еси нетленно, темже, испытание суетное о сем отвергше, православно и несомненно Матерь Деву Тя исповедуем, молимтися прилежно: в чистоте и целомудрии нас утверди, Всеблагая.
Ирмос: Житейское море воздвизаемое зря напастей бурею, к тихому пристанищу Твоему притек, вопию Ти: взведи от тли живот мой, Многомилостиве.
К лику преподобных отец Печерских причтен быти сподобился еси от Господа, святителю Павле, Иже яви нам твоя нетлением процветшия мощи, и чудесы от них истекающими всех уверяет, яко воистину угодник еси Божий, и молитвенник многомощный о душах наших.
Аще и в последняя лета пожил еси, святителю преподобне, но с древними святыми соравнился еси даром исцелений, яже источают нам твоя святыя мощи, яко цвет райский, благоуханием святыни услаждающия души наша.
Светом небесным осиянный явился еси, святче Божий, Киевскому митрополиту Евгению, ему повелев, да обретенный гроб твой оставит в покои: темже со слезами многими и усердным молением, припаде он к твоим тлению непричастным мощем, во всеуслышание исповедуя твое посещение.
Богородичен: В пучине моря житейскаго люте бедствуем, и боящеся потопления греховнаго, к Тебе, Мати Божия, вопием от души: помози нам, и не попусти погрузитися в пропасть погибели, но изведи нас, Благая, на злачную пажить спасения: да славим молитв Твоих силу, и благословим имя Твое во веки.
Вышния красоты желая, святителю Павле, в мире премирно пожил еси, нищетою, воздержанием и непрестанными молитвами предочищая себе к небесней славе: Церкве поборник быв, правды ради Божия многия скорби претерпел еси, и исповедания доблестию украшен, вшел еси в радость Господа твоего: Егоже моли непрестанно о всех нас.
Подражавый соименному ти апостолу языков в небоязненном исповедании, святителю Павле, не убоялся еси гневавшихся на тя сильных мира сего, но о правде Божией мужески свидетельствовал еси пред ними: сего ради престол твой святительский оставити принужден был еси, и многия скорби претерпев крепости ради исповедания твоего, в Лавре Печерстей тихое пристанище спасения себе обрел еси, идеже свято скончав жизнь земную, ко Господу прешел еси в селения святых: но яко имеяй дерзновение у престола Христова, молися непрестанно о всех нас.
Ирмос: Росодательну убо пещь содела Ангел преподобным отроком, халдеи же опаляющее веление Божие, мучителя увеща вопити: благословен еси, Боже отец наших.
Яко звезда путеводная светиши всем, хотящим жити в преподобии и чистоте, святителю отче наш Павле: оставив бо престол твой святительский, в Лавре Печерстей ревностно подвизался еси в бдениих, пощениих и молитвах непрестанных, во умерщвленном телеси сладце воспевая: благословен еси, Боже отец наших.
Тихо и богоугодно скончав жизнь твою земную, святителю, яко пшеница зрелая, пожат был еси и преставился еси в небесную житницу Христову, в радость вечную святых, идеже подвигем твоим воздаяние блаженное прияв, со безплотными зовеши: благословен еси, Боже отец наших.
Исполнися на тебе, отче, речение Христово: блажени изгнани правды ради, яко тех есть Царство Небесное. Се блажен еси воистину, блаженство Царствия Христова унаследивый, и от страны изгнания, в отечество небесное восприятый благостию человеколюбца Бога, Емуже во гласе радования и хваления вопиеши: благословен еси, Боже отец наших.
Богородичен: Тебе Необоримую стену, и спасения Ходатаицу стяжахом, Богородице Дево: Тобою хвалимся, смиреннии и грешнии, имуще Тя Покров и Защиту от врагов наших: Тебе убо молимся, Владычице, помози рабом Твоим, и избави нас от погибели вечныя.
Ирмос: Из пламене преподобным росу источил еси, и праведнаго жертву водою попалил еси: вся бо твориши, Христе, токмо еже хотети. Тя превозносим во вся веки.
Егоже возлюбил еси, Егоже ради и подвизался еси, святителю, Христос Господь, Той воздаде тебе щедрою рукою мзду небесную, и яко верный раб Его, вшел еси в радость чертога Его пресветлаго, идеже не забуди нас, отче, в молитвах твоих благоприятных к Богу, превозносимому во веки.
Лице Христово пресветлое и превожделенное созерцаеши, святителю, и со святыми предстоиши Престолу Господа славы, прославльшаго тя на небеси и на земли: на небеси блаженства райскаго наслаждаешися, на земли же нетлением и чудесы верныя просвещаеши, приводя их к славословию Бога, превозносимаго во веки.
Яко алавастр врачебный и сокровище исцелений, имать Лавра Печерская раку мощей твоих святых, отче Павле, новый исповедниче Церкве Русския: исповедание бо твое процвете нетлением и чудесы, и сими ясно свидетельствует, яко благоугодно бысть Богу, превозносимому во веки.
Богородичен: Пречистая Богородице Дево, в Печерстей обители Твоей сад духовен возрастившая преподобных отец, чудесы просиявших во вселенней, в нихже и Павел святитель прославися дары благодатными, умоли с ними покланяемую Троицу, помиловати нас обнищавших грехопаденми, и не лишити спасения вечнаго.
Ирмос: Бога человеком невозможно видети, на Негоже не смеют чини Ангельстии взирати: Тобою бо Всечистая, явися человеком Слово воплощенно, Егоже величающе, с небесными вои Тя ублажаем.
Ада и смерти победитель Христос, по смерти нетлением тя почте, святителю приснопамятне, сим показуя, яко душа твоя жива во веки о Господе пребывает, в блаженстве невечернем святых: егоже достигнути, отче, и нас сподоби твоими молитвами.
Великаго в добродетелех, великими чудесы Бог тя прослави, святителю Павле, явив нам твоя нетленныя мощи во врачевство недугом душевным и телесным: имже усердно покланяющеся, тя, заступника нашего, по долгу ублажаем.
Любовию тя воспевающих, святителю блаженне, и чествующих усердно твою святую память, не лиши предстательства твоего небеснаго: искушенный по всяческим, и нам искушаемым помози, да тя немолчно ублажаем.
Богородичен: Аще и много согрешаем, но не отчаяваемся покрова твоего, Владычице, Споручнице грешных и Взыскание погибших от нас именуемая, по достоянию Твоего к нам милосердия: темже воззри на нас Матернею любовию, и возстави от падения греховнаго, да Тя, Помощницу нашу, немолчно ублажаем.
Звезда пресветлая, от Тобольска в Киев пришедшая, являешися верным, святителю отче наш Павле: сиянием бо чудес твоих, всем зарю безсмертия ясно показуеши, и человеки ублажаеши преобидети сладкая, да возмогут, якоже и ты, стяжати возмездие небесное и вечную славу святых.
Госпоже Богородице, христиан Заступнице, помилуй нас грешных, и в добродетели укрепи: соблюди нас Твоим покровом, да наглая смерть не похитит нас неготовых, и доведи нас, Дево, в горнее Царство и вечную славу святых.
Радуйся, святителю всечестне, / Павле богоносне, / Владыки Христа таинниче и учениче, / верен Ему до конца пребывый: / тебе бо, отче, ни скорби, ни гонения / не отторгоша от любве Христовы, / юже исповеданием и защитою правил Церкве / ясно свидетельствовал еси, / тебе ныне заступника имамы на небеси, / угодниче Божий, / и с верою тебе молимся: / подаждь нам от духа ревности твоея по Бозе, / укрепи ны непоколебимы в православии, / и молися Христу, даровати нам велию милость.
Радуйся, главо освященная, / разума божественнаго преисполненная, / Духа Святаго благодатию приосененная: / твоего подвига доблестию / вся ны поучаеши, отче, / ничтоже предпочитати паче любве Христовы, / и верности уставом Святыя Апостольския Церкве, / ихже ты верный поборник был еси, / скорби претерпевый правды ради Божия. / Преклонися ныне к молитвам нашим, / святителю богомудре Павле, / и научи ны твоему богомудрию высокому, / да возможем верно совершати заповеди Христа Бога, / Егоже моли даровати нам велию милость.
Радуйся, архиереом божественное удобрение, / красото Церкве Русския / и Лавры Печерския присное радование: / твоими священными ученми / и образом жития твоего, святителю Павле, / вся верныя просвещаеши благодатно, / и к славословию Бога приводиши, / яко в наша последняя лета, / таковаго светильника и чудотворца нам дарова, / в нетлении почиющаго / и целебныя струи обильно источающаго. / Темже память твою святую верно совершаем / и молимтися прилежно: / моли Христа Бога, даровати нам велию милость.
Святителю богоблаженне, столпе Церкве непревратный, поборниче Православия: от утра жизни твоея на страже благочестия стоял еси, и до вечера смертнаго в подвизех духовных неослабно пребывал еси, отче наш Павле, Царствия Христова наследниче и Богом прославленный чудотворче, не премолчи вопия за ны ко Господу.