Уставные заметки - Служба Собору Смоленских святых

Текст бденной службы всем святым, в земле Смоленской просиявшим, воспроизводится (с исправлением опечаток) по архивной машинописи 1986 года, подготовленной сотрудником Издательского отдела Московской Патриархии игуменом Феофилактом (Моисеевым; ныне епископ Брянский и Севский); он же составил тропарь и кондак, вошедшие в эту службу.

Радуйся и веселися, земле Смоленская, защиту и помощь икону Владычицы Одигитрии в себе стяжавшая и Тою пределы отечества нашего оградившая и цветы благочестия, святии Церкве Российския, в ней насадившая.
Красуйся светло, земле Смоленская, о предстательстве Девы Одигитрии, град Смоленск от нашествия иноплеменных свободившей, яко Ты чуднаго воина Меркурия в подвизе мученичестем утверди и мнози благовернии во времена различна возрасти.
Утешайся, земле Смоленская, аще и мала еси протяжением твоим, обаче равноапостола Николая в пределех своих явившая и славных Питирима святителя и Антония, и премудраго Авраамия, отца иноков, со иными пустынники и преподобнии.
Вси почтим собор святых, в пределех Смоленских просиявших: богомудрых святых мучеников, святителей и князей, преподобных и исповедников, таже жен, целомудрия ради пострадавших, именованных, купно и неименованных, о нас Христу моление присно приносящих.
Приидите, российстии собори, светло восхвалим Спасителя нашего Бога, велие заступление, икону Матере Божией Одигитрии, земли Смоленстей даровавшаго и ограждением образа Ея святии мнози в земле той возрастившаго и нам мнози заступники и молебники даровавшаго, ихже молитвами летнюю память празднующим, молим помощь благовременную в скорбех наших даровати нам.
Ополчися окрест страждуших рабов Твоих, Владычице Одигитрие, купно со святыми всеми в уделех Смоленских просияшими и ниспосли богатую милость Твою, от напастей многоразличных, присно заступающи и спасающи люди Твоя.
Сошедшеся, братие, воспоем святыя вся, в земли Смоленстей просиявшия, от древних веков и до дней последних свою чудную помощь нам простирающия, от многоразличных болезней и печалей свобождающия ны, отраду и заступление нам присно подавающия.
Соборе Святых земли Смоленския, / водами священнаго Днепра омовенныя, / святители, преподобнии, страстотерпцы и благовернии / апостольскую веру соблюдшии / се ныне Святей Троице с Богородицею и лики безплотных предстояще / даруйте православным помощь небесную / во утверждение веры и спасение душ наших.
Величаем вас, святии вси в земли Смоленстей просиявшии, и чтем святую память вашу, вы бо молите о нас Христа Бога нашего.
Вси святии земли Смоленския, знаемии купно и незнаемии, в днешний день праздника вашего купно вси молитвы о сродницех ваших Богу принесите, да веру Христову Православную крепко содержаще, обрящем в памяти вашей крепость и утверждение.
Притекающе с любовию к пречестней иконе Твоей, Богородице, Путеводительнице, да обрящем в помощи Твоей крепость и утверждение.
Святии заступницы земли Смоленския: преславнии мученицы, достопоклоняемии святителие, преподобнии отцы, князи благовернии и исповедницы Христовы, молитву о сродницех ваших сотворите, да путь земный совершим, в любви вашей и помощи утверждаемии.
Ирмос: Поспешествовавшему Богу во Египте Моисеови, извести Израиля, Тому единому поим, яко прославися.
Вси помолимся усердно святым российским, в пределех Смоленских просиявшим, иже землю сию, много воюемую и теснимую, кровьми своими, труды и поты о Бозе Спасе нашем освятиша.
Пет буди достойно, первомучениче Российский, ветве благородия, юный княже Глебе, иже живот свой положи в земли Смоленстей, в ней же и погребен бысть и заступник усердный людем земли тоя явися.
Почудимся и восхвалим велию ревность Меркурия воина, по гласу Богоматере на защиту града Смоленска воставшаго и мучиническую кончину в неравном бою приявшаго.
Богородичен: Радуйся, Царице Одигитрие Владычице, Землю Российскую многажды от нападения врагов иноплеменных заступающая, граду же Смоленскому радование и утверждение являющая.
Ирмос: Утвердися сердце мое в Господе, вознесеся рог мой в Бозе моем: разширишася на враги моя уста моя, возвеселихся о спасении Твоем.
Восхвалим с любовию и в молитве теплей прибегнем к святым Российским, землю Смоленскую рождением своим почетшим и светильницы всемирнии о Христе Спасе явльшимся.
Воспоем и почудимся, како леторасль Смоленская, муж изряден, святитель Николай равен апостолом почтен бысть и трудами апостольскими, ученьми и молитвами землю Японскую просветил есть.
С равноапостолом да ублажени будут земли Смоленския прозябения светильницы Российстии, святителие Питирим, земли Тамбовския украшение, и Антоний, града Вологды утешение, таже ревностный о Господе просветитель земли Алтайския, преподобный Макарий священноархимандрит.
Богородичен: Пресвятая Владычице Одигитрие Путеводительнице, землю Смоленскую образом Своим святым освятившая и тем путь многим святым земли тоя указавшая, да воспета будет усердно.
Небесныя Церкве путеводителие, / подвигоположницы земли Смоленския, / земный путь в православной вере прошедшии / и святых отец предания сохранивши, / нам молите путь веры соблюсти / смирению смирившагося до смерти Крестныя Сына Божия подражающе / молитвами Богородицы / и спастися душам нашим.
Святии вси, в земли Смоленстей просиявшии, многообразными подвиги и трудами путь, к Богу ведущий, совершившии, молитеся о сродницех ваших, людех земли Российския, путь веры соблюсти и молитвами Богородицы Путеводительницы спастися душам нашим.
Ирмос: Покрыла есть небеса Христе Боже, смотрением Твоим, добродетель неизреченныя мудрости Твоея, Человеколюбче.
Песнь принесем, людие, святителем земли Смоленския, иже в ней родишася, таже и от многих концев Российских приидоша, и подвиги своими пределы Смоленския осияша.
Молим тя, святителю Игнатие, друже Авраамиев, таже святителю Михаиле и великий во архиереех Симеоне митрополите, из дальних стран пришедшии, моление о нас грешных Богу принесите, спасения нам вечное исходатайствующе.
Святителю блаженне Меркурие, ты Господу служив достойно, жертва страдальческая Тому принеслся еси, смерть мученическую прияв во исповедание имене Христова; моли спастися нам.
Богородичен: Пречистая Дево Одигитрие Путеводительнице, пути людския ко спасению устрояющи, люди мнози ко спасению в земли Смоленстей направила еси.
Ирмос: Утреннююще, Слове, в славу Твою и хвалу, восхваляем непрестанно образ Креста Твоего, егоже дал еси нам оружие в помощь.
Воспомянем вси и ублажим достойно всечестныя князи земли Смоленския, иже светлым житием, яко бисерием, землю тую украсиша и подвизи мнози Христу Богу принесоша.
Да воспоется радостно всеблаженный князь Ростислав Смоленский, труды мнози о отечестве своем и Церкви Христовой подъявший, и молитвенник крепок к Богу о людех Христовых явльшийся.
Преподобнии князие Феодоре со чадами твоими Давидом, Константином и Михаилом молитвы ваши усердно Богу принесите о отечестве вашем и земли Смоленстей, да милость получат вси живущии в той.
Богородичен: Пресвятая Богородительнице Одигитрие, путями, имиже веси, люди Твоя к Богу приведи, спаси и ущедри достояние Твое и молитвами святых Твоих на ны умилосердися.
Ирмос: Иона из чрева адова вопияще: возведи от тли живот мой. Мы же вопием: всесильне Спасе, помилуй нас.
Святии князие Смоленстии, вы не точию подвизи бранныя подъяли есте, но и исповедницы веры Православныя явишася, и кровь свою заветов ради веры тоя излияша.
Святая княгине Иулиание, града Вязьмы украшение, цвет целомудрия показалася еси и купно с супругом своим князем Симеоном мученица изрядная чистоты ради явилася еси; о чтущих тя прилежно помолися.
Княже Глебе Смоленский, ты многажды исповедник веры православныя в плену Литовском явился еси. Моли о людех твоих купно с преподобным князем Андреем Смоленским веру Христову ясно исповедати.
Богородичен: Мати Света, Богородительнице Пречистая, Одигитрие Путеводительнице, пути наша к Богу управи и Православную веру содержати укрепи.
Ирмос: Пещь горящую оросил еси Спасе, отроки спас еси поющыя и глаголющыя: благословен еси во веки Господи Боже, отец наших.
Да почтутся достойно отцы преподобнии, пределы Смоленския и град Смоленск молитвами своими, трудами, подвигами и деланием пустынным освятившии и заступницы усерднии к Богу о нас явльшиеся.
Како воспоем преподобничества звезду, покаяния проповедника и учителя изрядна, преподобнаго отца нашего Авраамия Смоленскаго, чудотворца преславнаго, много бед и скорбей Христа ради понесшаго.
Явльшиися на заре веры Христовой в древней земле Смоленстей преподобнии отцы наши Ефреме и Аркадие пречуднии, сотворите молитву о недостойных братиях ваших, к вам усердно притекающих.
Богородичен: Мати Пречистая Богородице, Путеводительнице жизни нашея, Ты премудро пути преподобных Твоих совершила еси. Не остави нас, погибающих.
Ирмос: В пещи отроки подражающее, духовную росу приемшии, верою зовем: благословите, дела Господня, Господа.
Лес и дебри Смоленстии, якоже и прочии леса и пустыни Российстии возрастиша души мнозех пустынножителей и преподобных, иже оплотом нашим, защитою и помощию пред Богом Спасом явишася.
Красуется светло Герасим преподобный, иже дебри Дорогобужстии молитвами своими освяти и наставник нарочитый монахов явися, той и ныне молитву деет о людех своих.
Преподобне Симоне архимандрите, ты ученик и сотаинник преподобнаго Сергия явися, таже Прохоре, преподобне Печерский, молите за люди отечества вашего, земли Смоленския, во еже спастися им.
Богородичен: Одигитрие Богородительнице, утешение наше, молитвами преподобных Твоих умоляемая, на молитвы наши умилосердися и радость в печали место даруй.
Ирмос: Паче естества Матерь, и по естеству Деву, едину в женах благословенную песньми верни Богородицу величаем.
Веселися, всечестный Соборе святых, в земли Смоленстей просиявших, иже люди земли тоя, многостраждущия и многожды воюемыя, от великих бед спасоша.
Красуйся, полче святых Смоленских, иже от многообразных страданий в земли сей Руси Великия защитою быша, люди честныя оградиша и от конечныя пагубы избавиша.
Радуйтеся, святии Смоленстии: святии мученицы, святителие со равноапостолом, блаженнии князие и преподобнии, земли сея прибежищем явившиися и купно со всеми людьми страждущими на защиту отечества подвигшиися, веру же православную сохранившии и утвердившии.
Богородичен: Егда воставаша великия брани и нападения и земля Смоленская во страсе и ужасе трепеташе, тогда Ты, Пресвятая Владычице Одигитрие, великим и благостным Образом Твоим оплотом земли тоя и всего отечества нашего явилася еси.
Светлии светильницы земли Смоленския, теплии предстателие и молитвенницы о душах наших, светло восхвалим вас и молитвенно припадем к вам, о спасении от зол и бед умоляюще.
Древняя земля Смоленская кровьми мученика князя Глеба освятися, таже заступлением святаго мученика Меркурия спасеся, еще же и кровным излиянием благоверныя Иулиании Вяземския с честным супругом ея утвердися, ихже молитвами, Спасе, спаси души наша.
Стих: Священницы твои облекутся в правду, и преподобнии твои возрадуются.
Святители всечестнии земли Смоленския, иже труды мнози о пастве своей положиша, таже и кровь пролияша, со равноапостолом предивным Николаем о людех ваших молитву Госповеди сотворите.
Стих: Воззваша праведнии и Господь услыша их.
Вси благовернии князие земли Смоленския со святым Ростиславом, Феодором же и чады их о пастве всей земли Российстей усердно Госповеди молитву принесите.
Стих: Блажени вси, боящиися Господа, ходящии в путех Его.
Благословенни есте, вси преподобнии земли Смоленския со преподобным Авраамием премудрым; иноческую молитву вашу, яко и во времена древняя, о людех страждующих земли нашея Госповеди вознесите.
Святии сродницы наши, в земли Смоленстей возсиявшии, вы очи Христовы Церкве православныя, заступницы наши, молитвенницы и помощницы!
Молим вас, вси святии Смоленстии: святии мученицы и исповедницы, достопоклоняемии святителие со равноапостолом, благовернии князи и преподобнии отцы, не отступайте помощию вашею, любовию и попечением от грешных сродник ваших, в вас надежду спасения вечнаго обретших, заступницы в скорбех наших и помощницы покаяния. Умолите Господа Сил, да содержим крепко веру святую православную во вся дни живота нашего и ею окормляеми достигнем онаго вечнаго дне, идеже вси вы светло сияете в незаходимем Царстве Святыя Троицы, Отца и Сына и Святаго Духа. Аминь.