Уставные заметки - Служба Одесским святым

Бденная служба Всем святым, в земле Одесской просиявшим, публикуется по сборнику «Службы Одесским святым» (стр. 3 – 19). За помощь в оцифровке огромная благодарность достопочтенному vit_gil.

Ликуй ныне, богоспасаемый граде Одессо, / яко лучами солнечными просвещаемый чудотворным Образом Касперовским; / се бо богомудрый Иннокентий / со твердыми во мучениих Анатолием и Григорием, / пречудный Гавриил-храмостроитель / и дивный в чудотворениих Иона / со преподобным отцем Кукшею, / яко звезды небесныя сияющи, / присно молятся спастися граду нашему // и всем верою живущим в нем.
Златозарный торжества день / освети сияньми невечерними / ожестевшая сердца наша / светом божественныя благодати. / Тако, радующеся, прославим // Отцев собор достолепный.
Восторжествуем ныне, / веры отеческия наследницы, / и сердцем окрыленным, / от избытка радости поющим, / прославим досточудных Отцев блаженных, // молящихся во еже спастися нам.
Прехвальнии богоносцы, / присноживии отцы и наставницы, / днесь пресветлая ваша память / созывает христоименитых сословие / с лики пламенновидных и многоочитых // Троицу Святую воспети боголепно.
Царства Христова наследницы всечуднии, / хранители небеснии града нашего, / преславнии и всепетии чудотворцы земли Одесския, / чудес ваших преизобильныя токи / излейте милостивно на нас, // земли нашея плод благословенный.
Воспоим, людие, Господеви песнь хвалебную, / явившему во Отечестве нашем дивных угодников Своих и чудотворцев, // показующих нам веры и благочестия образ.
Припадающе к духоносным телесем вашим, / града Одессы небеснии хранители, / христолюбиваго Отечества нашего плод сторичный, / поборницы богодержавнии веры Православныя, / любовию молим вас, святии, // во еже просветити и спасти души наша.
Тако глаголет Господь: во время приятное послушах тя и в день спасения помогох тебе. И создах тя и дах тя в завет языков, еже устроити землю и наследити наследие пустыни. Глаголюща сущим во узах: изыдите! И сущим во тьме: открыйтеся! На всех путех пастися будут, и на всех стезях пажить их. Не взалчут, ниже вжаждут, ниже поразит их зной, ниже солнце, но Милуяй их утешит я и сквозе источники вод проведет я. И положу всякую гору в путь и всякую стезю в паству их. Се сии издалеча приидут, сии от севера и моря, инии же от земли Персския. Да веселятся Небеса, и радуется земля, да отрыгнут горы веселие и холми правду, яко помилова Бог люди Своя и смиренныя людей утеши. Рече же Сион: остави мя Господь, и Бог забы мя. Еда забудет жена отроча свое? или не помилует исчадия чрева своего? Аще ли же и сих забудет жена, но Аз не забуду тебе, - глаголет Господь.
Восхвалим убо мужи славны и отцы наша в бытии. Многу славу созда Господь в них величием Своим от века. Господствующе в царствиих своих и мужи, именити силою, советующе разумом своим, провещавшии во пророчествах; старейшины людий в советех и в разуме писания людий. Премудрая словеса в наказании их; ищуще гласа мусикийска и поведающе повести во писаниих, мужи богатии, обдаровани крепостию, мирно живуще в жилищих своих. Вси сии в родех прославлени быша, и во днех их похвала. Суть от них иже оставиша имя, еже поведати хвалы. И суть, ихже несть памяти, и погибоша, яко не сущии, и быша яко не бывше, и чада их по них. Но сии мужие милостивии, ихже правды не забвены быша, с семенем их пребудет доброе наследие, изчадия их в заветех. Остася семя их и чада их по них, до века пребудет семя их, и слава их не потребится. Телеса их в мире погребена быша, а имена их живут в роды. Премудрость их поведят людие, и похвалу их исповесть Церковь.
Праведных души в руце Божией, и не прикоснется их мука. Непщевани быша во очесех безумных умрети. И вменися озлобление исход их. И еже от нас шествие - сокрушение, они же суть в мире. Ибо пред лицем человеческим аще и муку приимут, упование их безсмертия исполнено. И вмале наказани бывше, великими благодетельствовани будут, яко Бог искуси я и обрете их достойны Себе. Яко злато в горниле, искуси их и, яко всеплодие жертвенное, прият я, и во время посещения их возсияют и, яко искры по стеблию, потекут. Судят языком и обладают людьми, и воцарится Господь в них во веки. Надеющиися Нань уразумеют истину, и вернии в любви пребудут Ему. Яко благодать и милость в преподобных Его и посещение во избранных Его.
Радуйтеся, боголюбивии пастыри, / тесным путем доброделания прошедшии, / благочестия церковнаго хранители, / чистоты веры Православныя блюстители. / Молитеся ко Господу // даровати душам нашим мир и велию милость.
Радуйтеся в радость Господа вшедшии, / Отца Небеснаго чада богомудрии, / Сына Единороднаго благоразумнии возследователи, / Духа Всесвятаго добротокраснии обители, / Триипостаснаго Божества вечныя трапезы сопричастницы, // молящиися о душах наших.
Украсися доме церковный, / прииде день торжества святаго / память мужей богомудрых, / положивших в житии своем основание / Христа Жизнодавца.
Днесь Христос Бог / на свещнице церковней / поставляет Своя светильники, / озаряющия сердца верных // светом божественныя благодати.
Царствие Божие, / в силе пришедшее, / восприяли есте в душах, богоблаженнии, / благочестным житием своим // и верою правою.
Радуйся, Преблагословенная в женах, / уневещенная Дщерь Отца безлетнаго, / Слова сопревечнаго блаженное Селение, / Духа Всесвятаго благодатное приятелище. / Радуйся, плоть человечу соткавшая / вся от несущих к жизни Призвавшему, / радуйся Зиждителя с тварию на веки соединившая, / радуйся, Тобою бо мир обновляется // и Сыном Твоим людие освящение и спасение приемлют.
Ангелом подобницы, / умозрители превыспренних, / Троицы Святыя поборницы, / молитеся о нас усердно, // святии и прехвальнии наши наставницы.
Доме Пречистыя, / уделе благословенный, / Русь Святая, / храни веру Православную, // в ней же тебе утверждение.
Всечестный Собор всеблаженных предстателей наших / Одесскую землю подвиги и чудесы своими озаривших: / святителей и преподобных, / мучеников вкупе и праведных всих в пениих прославим, / просвещаеми добродетельми и чудесы их преславными, / согласно умильно к ним возопиим: / угодницы Божии возлюбленнии, // молитеся ко Господу спастися душам нашим.
На Бог Господь: тропарь воскресен 2-го гласа, дважды. Слава, тропарь святых. И ныне, Богородичен воскресен по гласу тропаря святых.

По стихословиих седальны воскресны с припевы и Богородичны их.
Величание:

Величаем вас, / преславнии чудотворцы земли Одесския, / града нашего небеснии заступницы, // и молитвенницы о душах наших.
Стояще во храме Господни, / во дворех дому Бога нашего, / хвалите имя Всеславнаго и Предивнаго во святых Своих, / превозносите, людие, вочеловечшагося Господа, / даровавшему граду нашему таковых молитвенников, / души наша озаряющих светом благочестия / и сердца наша движущих к славословию Живоначальныя Троицы.
3аступницу Тя жизни вемы / и твердую Хранительницу, Дево, / и искушений тучи разсеявающую, / и бесов нападения отгоняющую, / и молимся всегда: / от гибельных страстей наших избави нас.
Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.
Припев: Вси святии земли Одесския, молите Бога о нас.
Похвальное пение от избыта сердца уста наша вознести дерзают, вы же, о преславнии светильницы земли Одесския, от тяжких и лютых ны спасите.
Отверзите уста наша немощная, да по достоянию величати вас возможем, дивнии и всепетии чудотворцы, молитвами вашими от лютых спасаемии.
Христа Господа присно молите, богоизбранный соборе и всепетый, да милостию Своею сохранит град и люди и от тяжких и лютых ны спасет.
Богородичен: Воспевающе песни молебныя, к Тебе прибегаем, о Мати Всепетая. Ты же, яко Владычице Державная, от тяжких и лютых нас спаси.
Ирмос: Небеснаго круга верхотворче Господи, и Церкве Зиждителю, Ты, мене утверди в любви Твоей, желаний краю, верных утверждение, Едине Человеколюбие.
Ангельских чинов сомолитвенницы, преславнии угодницы Божии и всепетии, о граде и стране предстательствуйте выну и во Православии недвижимы ны утвердите.
Личе богоизбранных отец богоносных, у Престола Божия предстоящии, молитеся ко Господу, да от бед сохранит град и люди и во Православии страну нашу утвердит.
Угодницы Божии всеславнии, града нашего похвало и земли досточудное утверждение, молитвами вашими необоримы ны во Православии утвердите.
Богородичен: Покров Твой, Мати Дево, воспевающе, имже от злых избавление прияхом, Тя присно молим во Православии ны недвижимы утвердити.
Предстателие наши неусыпнии, / ходатаи о нас непрестаннии, / не презрите молений недостойных чад ваших, / но поспешите на помощь нам, во умилении днесь взывающим: / ускорите на молитву и потщитеся на умоление, // непрестанно моляшеся о верою чтущих вас.
Память собора всечестных отцев совершающе, / боголепными песньми прославим Божественнаго Утешителя, / даровавшаго явления Своя комуждо на пользу / и любовию всесовершеннейшею оросившаго сердца верных Своих. / Сего ради Господа песнословяще, / ублажаем вас, предстателие наши, // вы же непрестанно молитеся о верою чтущих вас.
Моление теплое принесите, прехвальнии, / ко Всемилостивому Богу Спасу нашему, / о граде и земле вашей предстательствующе; / от всякаго зла сохраните чада ваша / и от бед всяческих избавите, // небеснии и всепетии заступницы наши.
Моление теплое и Стена необоримая, / милости Источниче, мирови прибежище, / прилежно вопием Ти: Богородице Владычице, предвари, / и от бед избави нас, // Едина вскоре предстательствующая.
Ирмос: Услышах, Господи, смотрение Твоего таинства, разумех дела Твоя, и прославих Твое Божество.
Руце присно ко Господу воздевающе, молитеся, отцы наши богомудрии, да от грехов очистит и страсти исцелит рабов Своих, во умилении взывающих: слава силе Твоей, Господи.
Исцеление испросите нам, всеблаженнии, елеем молитв ваших сердца наша умащающе, да Христу Спасу песнь вопием немолчно: слава силе Твоей, Господи.
Небесному Престолу предстояния молитвами вашими и нас сподобите, да купно с вами во веки воспоим: слава силе Твоей, Господи.
Богородичен: Отца Превечнаго Слове Собезначальне, Матере Твоея молитвами сохрани люди Твоя и купно со святыми пети сподоби: слава силе Твоей, Господи.
Ирмос: Просвети нас повелении Твоими, Господи, и мышцею Твоею высокою Твой мир подаждь нам, Человеколюбче.
Шуяго стояния на страшнем судищи Христовом избавите ны, преславнии, и десныя страны причтения вашими молитвами сподобите, светильницы земли Одесския.
Умилостивите Господа о нас, во мраце греховнем погибающих и светом богопознания осветите сердца наша, песни похвальная вам вопиющих, о преславнии светильницы земли Одесския.
От нощи неведения утренюем вам, угодницы Божии всемилостивии: Света Невечерняго зрения и нас сподобите и Правдою вечною сердца наша осияйте, преславнии светильницы земли Одесския.
Богородичен: Даруй людем милости Твоя Мати Всепетая, спаси нас, Дево Владычице, пощади чада Твоя, Всемилостивая Игумение земли Одесския.
Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся яко Иона: от тли, Боже, возведи мя.
Естества законы превозмогающе, ангелом на земли уподобилися есте, пречуднии, темже молитвами вашими из глубины неведения изведите нас, да с горними лики купно Господа величаем.
Силою греха во глубины страстей низриновенных, молитвами вашими исхитите, угодницы Божии всеславнии, да предстательством вашим спасении, присно Господа величаем.
Суеты лукавыя сети и греха вседерзкаго узы расторгните молитвами вашими, всепетии, и евангельскаго света невечерняго зарями просветите сердца всех поющих вас и милость Господню присно величающих.
Богородичен: Колеблемых страстьми и грехи обуреваемых, Владычице милостию Твоею защити, да от злых избавлении, Покров Твой выну величаем.
Ирмос: От Иудеи дошедше отроцы, в Вавилоне иногда, верою Троическою пламень пещный попраша, поюще: отцев Боже, благословен еси.
Искушений пещь, огнем всезлобным разженную, молитвами вашими угасите, Ангели земнии и человецы Небеснии, да купно с вами пети возможем: отцев и наш Боже, благословен еси.
Мира вселукавейшаго сетей многокозненных избегнути нас сподобите, да житие ваше и подвиги во образ приимше, ко Господу шествуем непреткновенно, выну поюще: отцев и наш Боже, благословен еси.
Чудесы и подвиги вашими наставляеми, огня мирскаго избегати научаемся, огнь любве Господней в сердце носяще и радостию поюще: отцев и наш Боже, благословен еси.
Богородичен: Удел Твой сохрани, Богородице Дево, от всякаго злаго обстояния ограждая град и люди, Сына Твоего знамение носящия и непрестанно взывающия: отцев и наш Боже, благословен еси.
Ирмос: Царя Небеснаго, Егоже поют вои ангельстии, хвалите и превозносите во вся веки.
Дивными и всесветлыми лучами освещаеми, от апостольскаго креста нам источаемыми, Андрея прославляем Первозваннаго и земли нашея первоблаговестника и, сим научаеми, Господа поим во вся веки.
Огнем любве божественныя распаляеми, Анатолий всеславный священномученик, Григорий, похвала Царьградская, Павел и Геннадий достоблаженнии, купно со всеми новомученики земли нашея, ко страданию шествуют безбоязненно и подвигом своим нас научают Господа воспевати во вся веки.
Трубу златословесную Божественнаго Духа, Иннокентия богомудраго величаем, купно со преподобными Кукшею и Гавриилом и со Ионою, града нашего заступлением, и Господу песнь непрестанно приносим, Сего воспевающе во вся веки.
Богородичен: Витийствовати не дерзаем пред престолом Твоим, Владычице, Мати Всепетая, но, благодатию укрепляеми, песни Тебе молебныя приносим и милость Твою воспеваем во вся веки.
Ирмос: Воистинну Богородицу Тя исповедуем, спасеннии Тобою, Дево Чистая, с безплотными лики Тя величающе.
Отцы наши всеблаженнии, дивныя заступницы земли нашея, Господа присно молите от всякаго зла сохранити и во Православии утвердити чада ваша духовныя.
Ризы своя убелившия кровию Агнца Божественнаго, соборе предивный и всепетый, молитвами вашими одеяние душ наших просветите и Господню славу пети сподобите чада ваша духовныя.
Царствия Христова сопричастники и нас быти сподобите, граждане Иерусалима Горняго, и к Небеси путевожди явитеся чадом вашим духовным.
Ангели земнии и человецы Небеснии, звезды всесветлыя неба церковнаго, похвалы наша приимите и во Православии утвердите чада ваша духовныя.
Богородичен: Мучений вечных избави рабы Твоя, Богородице Дево, и Царствия Небеснаго причастники быти сподоби, да милость Твою воспеваем купно со всеми святыми земли нашея во веки веков.
В песнех восхвалим светила незаходимая земли нашея и таинники священныя Божественнаго Слова, Христа славяще сих просветившаго и в скорбех помощники нам даровавшаго.
На хвалитех стихиры на 8, воскресны 4, глас 2. Таже святых 4, глас 8; Слава, стихира Евангельская: И ныне, Преблагословенна еси Богородице Дево:

Стихиры на хвалитех, глас 8.
Подобен: О, преславнаго чудесе:

О преславнаго чудесе! / Духонасажденный сад / святых Отец богоносных / верными любовию прославляется днесь. / Славословят Небеснии и земнии, / устрашаются демонския полки. / О, каковые предстатели нам земным даровашася! / Их же молитвами, Христе, спаси души наша, // яко Един Благоутробен.
О достоблаженнии светильницы! / Подвиги и чудесы своими озарили есте вси концы земнии / и осияли верных сердца. / Песнословят вас днесь православных собори, / сликовствуют Силы Небеснии, / во святых дивному Богу славословие приносяще. / Их же предстательством, Щедре спаси души наша, // яко Благ и Человеколюбец.
Стих: Веселитеся о Господе и радуйтеся праведнии.
Молитвенницы наша неустаннии, / чудес источницы неоскуднии, / благопослушливии и щедрии милостодавцы, / любоблагоутробнии святии пастырие! / Приклонитеся к молениям нашим, / вонмите воздыханиям сердечным, / испросите дар коемуждо на пользу, / да вашим ходатайством спасаеми, // славословие Богу приносим.
Стих: Дивен Бог во святых Своих, Бог Израилев.
О богоявленный Отцев собор! / Днесь на похвалу вашу сошедшеся, / паки воспомянуша житие и подвиги ваша, / душами умилимся и возрадуемся, / и песни достолепно воспоим, / и возвеличим память вашу! / О, боголюбезнии пастырие наши! / Вознесите ко Христу Богу молитву, // да спасет души наша.
Блаженны воскресны гласа на 4 и от канона святых песнь 3-я на 4.
Прокимен, глас 4: Святым, иже суть на земли Его, / удиви Господь вся хотения Своя в них.
Стих: Сохрани мя Господи, яко на Тя уповах.
Апостол к Евреем, зачало 330.
Евангелие от Матфея, зачало 11.
Причастен: Радуйтеся праведнии о Господе, правым подобает похвала.
О всеблаженнии и достохвальнии угодницы Божии, подвиги и чудесы своими землю нашу освятившии и нам путь ко спасению явившии! К вам усердно прибегаем и вам молимся со упованием крепким: принесите за нас грешных святыя молитвы ваши ко Господу и исходатайствуйте у благости Его вся благопотребная душам и телесем нашим, укрепите нашу веру, оградите нас от искушений и соблазнов, сохраните от грехопадений, возгрейте в нас святую любовь ко Господу и ревность о спасении нашем. Церкви святей и всему Отечеству нашему испросите мир, тишину и благоустроение. О преславнии и досточуднии заступницы наша, звезды всесветлыя Неба церковнаго, крини благоуханнии вертограда Божия, не презрите воздыханий наших, но да предстательством вашим и благодатию Божиею соблюдаеми и спасаеми и мы, грешнии, сподобимся чистым сердцем купно с вами и всеми святыми благословити и воспевати всесвятое имя Отца и Сына и Святаго Духа во веки веков. Аминь.
О всеблаженнии и достохвальнии угодницы Божии, подвиги и чудесы своими землю нашу освятившии и нам путь ко спасению явившии. К вам усердно прибегаем и яже от сердец молитвы приносим:
О святый апостоле Андрее, учениче Спасов Первозванный, молитвами твоими утверди во правоверии землю нашу, яже тобою Светом Истины Христовы просвещена бысть.
О столпе незыблемый Церкве православныя, пречудне Анатолие священнострадальче, Крест служения архипастырского на рамена своя подъемый и на Голгофу радостно возшедый, предстательством твоим непоколеблемо ересьми и расколы стадо словесных твоих овец во веки сохрани.
О всеславный священномучениче отче Григорие, Константина града доблейственнейший первосвятителю, за люди твоя душу положивый, Господа присно моли, да низпошлет нам Свою благодать и укрепит во скорбех и обстояниих, находящих на ны.
О великий во иерарсех Иннокентие богомудре, Духа Всесвятаго трубо златословесная, Господа умоли о пастве твоей, да благодатию Своею покрыет и сохранит град наш от всякого зла и щедроты велия подаст людем Своим.
О благоуханный цвете горы Афонския, храмостроителю всеусердный, отче Гаврииле, моли Господа, да благодатию утвержденныя и добродетельми светлоукрашенныя души наша обители Себе соделает.
О богопросвещенный старче и веры Православной исповедниче, богоносне отче Кукшо, не остави ны, чада твоя духовныя, сиры, но явися нам путевождь к Свету невечернему Царствия Божия.
О премилостивый отче Ионо, чудотворче великий и пастырю добрый стада Христова, молитвами твоими во ограде церковней чада твоя сохрани от злых обычаев мира, таже от погибельнаго и тлетворнаго духа века сего.
О преславнии и досточуднии заступницы наша, звезды всесветлыя неба церковнаго, крини благоуханнии вертограда Божия, укрепите нашу немощь, оградите нас от искушений и соблазнов, сохраните от грехопадений, возгрейте в нас святую любовь ко Господу и ревность о спасении нашем, да благодатию Божиею соблюдаеми и спасаеми и мы грешнии сподобимся чистым сердцем купно с вами и всеми святыми благословити и воспевати всесвятое имя Отца и Сына и Святаго Духа во веки веков. Аминь.