Уставные заметки - Иная служба преподобным отцем Глинским

Иная, также бденная, служба Глинским старцам составлена в России, публикуется по авторской машинописи.

Киими похвальными венцы / увязем преподобных отцев Глинских? / Разделенныя телесы, и совокупленныя духом, / Богоизбранную и всечестную шестинадесятицу, / Духа Святаго даровании преисполненную; / монашества и старчества светильников, / Православия столпов непоколебимых, / учения евангельскаго истинных наставников, // подающих миру велию милость.
Киими песненными гласы / восхвалим святых отцев, в пустыни Глинстей просиявших? / Филарета Богомудраго, / обители возобновителя и возродителя духовнаго; / Богоноснаго Василия, / умнаго делания рачителя и добротолюбия наставника; / Феодота препростаго, / чистотою и незлобием младенствовавшаго; / Макария блаженнаго, / от ангела Божия старчества повеление приемшаго; / молитвенников теплейших за ны ко Господу, // подающему нам велию милость.
Киими достойными похвалы / увенчаем преподобных старцев Глинских? / Мартирия, воздержания ревнителя, / псалмопевца и имене Господня хвалебника; / смиренномудраго Евфимия, / алтаря святилища многолетнаго служителя; / Илиодора светлейшаго, дару солнца тезоименитаго, / дары духовныя от Солнца Правды Христа Бога восприявшаго; / Досифея благоговейнаго, / ангельское пение при кончине старца Феодота слышати сподобившагося; / преподобническими венцы увязенных от Христа Бога, // подающаго вами нам велию милость.
Киими хвалебными гласы / воспоем лик Богодостойных отец? / Благоутробнаго Иннокентия, / отца чадолюбиваго и милосерднаго; / Иоанникия, скитскаго жития устроителя, / устава и правил церковных ревнителя; / Богомудраго Серафима, / окормления старческаго во обители возродителя; / Архиппа и Луку, соузом любве духовныя связуемых; / тесноты иноческаго жития терпения образы, // подающии миру велию милость.
Киими песненными добротами / украсим Божественный сонм преподобных отец, / во дни гонения на Церковь и на веру Православную просиявших? / Святителя Серафима, / старца духоноснаго и архиерея преславнаго земли Иверския; / Серафима, Абхазии украшение, / обители Глинския духовника и тайноведца душ человеческих; / Андроника исповедника, / труженика смиреннаго на ниве Христовой; / великаго ангельскаго образа совершенства восприемников, // подающих миру велию милость.
Приидите, вернии, / во обитель Глинскую притецем, / приидите, да сердцами согреемся и просветимся, / на свещнице бо тыя возжглася свеща многосветлая преподобных отец, / горящи и светящи всему миру даровании духовными, / елеем дел благих светильники своя украсивших, // освящая и просвещая душы наша.
Праведницы во веки живут, и в Господе мзда их, и попечение их у Вышняго. / Сего ради приимут Царствие благолепия и венец доброты от руки Господни, / зане десницею покрыет их и мышцею защитит их. / Приимет всеоружие рвение Свое и вооружит тварь в месть врагом. / Облечется в броня правды и возложит шлем, суд нелицемерен. / Приимет щит непобедимый, преподобие. / Поострит же напрасный гнев во оружие; / споборет же с ним мир на безумныя. / Пойдут праволучныя стрелы молниины / и, яко от благокругла лука облаков, на намерение полетят. / И от каменометныя ярости исполнь падут грады, / вознегодует на них вода морская, реки же потопят я нагло. / Сопротив станет им дух силы, и, яко вихор, развеет их / и опустошит всю землю беззаконие, и злодейство превратит престолы сильных. / Слышите убо, царие, и разумейте, навыкните, судии концев земли. / Внушите, держащии множества и гордящиися о народех языков, / яко дана есть от Господа держава вам и сила от Вышняго.
Праведных души в руце Божией, и не прикоснется их мука. / Непщевани быша во очесех безумных умрети, и вменися озлобление исход их. / И еже от нас шествие сокрушение, они же суть в мире. / Ибо пред лицем человеческим аще и муку приимут, упование их безсмертия исполнено. / И вмале наказани бывше, великими благодетельствовани будут, / яко Бог искуси я и обрете их достойны Себе. / Яко злато в горниле искуси их, и яко всеплодие жертвенное прият я. / И во время посещения их возсияют и, яко искры по стеблию, потекут. / Судят языком и обладают людьми, и воцарится Господь в них во веки. / Надеющиися Нань разумеют истину и вернии в любви пребудут Ему. / Яко благодать и милость в преподобных Его, и посещение во избранных Его.
Праведник, аще постигнет скончатися, в покои будет. / Старость бо честна не многолетна, ниже в числе лет исчитается. / Седина же есть мудрость человеком, и возраст старости житие нескверное. / Благоугоден Богови быв, возлюбен бысть, и живый посреде грешных преставлен бысть. / Восхищен бысть, да не злоба изменит разума его, или лесть прельстит душу его. / Рачение бо злобы помрачает добрая, и парение похоти пременяет ум незлобив. / Скончався вмале, исполни лета долга. Угодна бо бе Господеви душа его, сего ради потщася от среды лукавствия. / Людие же видевше и не разумевше, ниже положше в помышлении таковое. / Яко благодать и милость в преподобных Его, и посещение во избранных Его.
Небо и земля, море и воздух, и вся, яже в них, / повинуются тому, егоже сердце страха Божия исполнено, / сего ради чудотворения дивная в вас быша, преподобнии: / немокренно водою шествова Иоанникий, / Филарет зрит душу праведничу ангелы несому, / Архип чудно путь во обитель осветил есть, / ангел Божий Феодота возбуждает на молитву, / Досифей же пением ангельским утешается; / паче же исцеления и пророчества изливасте богатно, отцы Богоноснии, / идеже бо Бог, превысший естества, Свое присутствие являет, // тамо побеждается естества чин.
Един и Тойжде действуяй Дух Святый, / разделяя властию дарования коемуждо, якоже хощет, / овому даде слово премудрости, / иному же — слово разума, / другому же — веру, / иному же — дарования исцелений, / другому же — действия сил, / иному же — пророчество, / другому — разсуждения духовом; / вы же, отцы преподобнии, / вся сия явления Духа на пользу приемше, / дарований больших поревновали есте, // сего ради еще по превосхождению путь вам от Господа показася.
Пустынь Глинская, / цветник духовный, / украшай твой дом, / в немже Божественный // сонм преподобных отец прославися.
Стих: Честна пред Господем / смерть преподобных Его.
Церковь Христова, / красуйся и ликуй, / се бо преподобныя твоя / Престолу Владычню // во славе предстоят радующеся.
Стих: Блажен муж, бояйся Господа, / в заповедех Его восхощет зело.
Соборе святых отцев Глинских, / полче Богоносный, / молитеся ко Господу / о возрождении монашества в земнем Отечестве вашем // и о почитающих вас любовию.
Павел апостол Онисима из беглаго раба мучеником соделал есть, / Илия из землепашца пророка Елиссея приуготови, / Моисей Иисуса более всех украси совершенствами; / вы же, отцы преподобнии, / достойнии ученицы наставников своих явистеся, / разуму и премудрости от них научившеся, / глаголали есте, от Духа Святаго просвещаеми, / святии Божии человецы, // истины Христовы провозвестницы.
Преподобнии и Богоноснии отцы наши Глинстии, / ученьми древних отцев старчество в обители утвердившии, / молитвою, кротостию, постом и смирением / в послушании любовь Христову стяжавшии: / во дни гонения в разсеянии за веру Православную, / яко звезды на небесех всю вселенную просветившии / и ко Христу приведшии. / Молитеся ко Господу, // помиловати и спасти душы наша.
Грозд старчества на лозе преподобства израстившии, / преподобнии отцы старцы Глинстии, / земли Русския печальницы / и народа Божия ко спасению наставницы, / Владыку всех молите / мир вселенней даровати // и душам нашым велию милость.
В Писании указа нам Бог спасения путь: / вопроси отца твоего, и возвестит тебе, / старцы твоя и рекут тебе, / Святый бо Дух научает отцы, яже подобает рещи, / смирения ради и правоты сердца вопрошающих. / Вы же, старцы Глинстии преподобнии, / яко уста Господня явилися есте, / волю Божию народу возвещающе, / Богомудрыми словесы душы человеков к Богу приводяще.
Утаение греха недугующему смерть уготовляет, / жало бо, рече апостол, смерти — грех. / Сего ради вы поучасте, отцы преподобнии: / да никтоже сокрывает помыслы своя, / но старцем исповедует, / исповедание бо истиннаго покаяния и грехов прощения основание есть, / и надежда спасения душе, // с печалию о гресех истинно кающейся.
Ублажаем вас, / преподобнии отцы наши Глинстии, / и чтем святую память вашу, / наставницы монахов // и собеседницы ангелов.
Якоже бо тело едино есть и уды имать многи, / вси же уди мнози едино тело суть; / тако и вы, отцы преподобнии, / мнози едино тело есте о Христе, / имуще дарования по благодати данней вам различна, / и аще един славится уд, / с ним радуются и прославляются вси уди, // в Соборе святых, во обители Глинстей просиявших.
Прокимен, глас 4: Честна пред Господем / смерть преподобных Его. Стих: Что воздам Господеви о всех, яже воздаде ми?
Не даст Господь преподобному Своему видети истления, / не умроша бо святии, но сном честным уснуша. / Темже, яко многоценное сокровище, в земли сокровенное, / честныя мощи ваша нам являет, / преподобнии отцы Глинстии, / яже с любовию лобызаем, // и святую память вашу ублажаем.
Ирмос: Грядите, людие, / поим песнь Христу Богу, / раздельшему море и наставльшему люди, / яже изведе из работы египетския, // яко прославися.
Припев: Преподобнии отцы наши Глинстии, молите Бога о нас.
Грядите, людие, в обитель пустынно-Глинскую, / поим песнь Христу Богу, / собор отцев преподобных в ней Явившему, / яко прославися.
Любителя добродетели тезоименнаго, / мудраго настоятеля и строителя Филарета восхвалим, / обители возобновителя и возродителя духовнаго, / непрестанными труды и подвиги добродетели иноческия воплотившаго, / и твердое основание Богородицкия Глинския пустыни положившаго.
Илиодоре священне, / Святителя Христова Николая пестуна имевый, / дващи заступлением Чудотворца сего смерти избегнувый, / третицею же в Мирех Ликийских при гробнице Святителя / милость Божия елеем радости из кандила на тя излияся.
Богородичен: Неплоды раждает Храм Божий, Едину Богородицу, / радуются днесь Иоаким и Анна, / и обитель Глинская духовно торжествует, / се бо Дева происходит от утробы неплодныя / во спасение душ наших.
Ирмос: Утверди нас в Тебе, Господи, / Древом умерщвлей грех, / и страх Твой всади // в сердца нас, поющих Тя.
Святыя Горы Афонския устава восприемницу, / обитель Глинскую в отцех ея прославим, / преподобнаго и богоноснаго старца Паисия наследницу, / и пустыни Оптиной сродницу духовную.
Крины сельныя вы есте, отцы Боголюбивии, / добротолюбием и доброделанием в лузе духовнем обители Глинския процветшии, / и святостию жития во Христе вселенную всю облагоухавшии.
Имже несть управления, падают, аки листвие, / спасение же есть во мнозе совете, — Притча рече; / ты же, Богомудре Филарете, сие слово Писания добре ведая, / старчество в вертограде пустыни Глинския насадил еси, / еже израсти мирови великих и богодохновенных отец.
Богородичен: Яко миром благовонным, / ум и сердце облагоухаша преподобнии отцы, / Сладчайшее Имя Твое призывая, Пречистая, / денно и нощно взывающе: / Пресвятая Богородице, спаси нас!
Наследницы древних отцев бысте, преподобнии, / тех последуя житию и учению, / обычаю и воздержанию, / молитве и предстоянию. / С нимиже, имея дерзновение ко Господу, / прощение согрешений и спасение испросите вопиющым вам: / радуйтеся, отцы Богоноснии, // пустыни Глинския благое прозябение.
Радуйся, пустынь Глинская, / благодать старчества унаследовавшая, / врачебнице недугов душевных и телесных, / училищем велиим жития иноческаго от преподобнаго Серафима Саровскаго нарекшаяся, / и собором Богоносных отец, зде просиявших, возвеличенная. / Сего ради и мы со умилением зовем им: // радость возвещает прославление ваше всей вселенней.
Ирмос: Услышах, Господи, / слух Твоего смотрения / и прославих Тя, // Едине Человеколюбче.
О, чудесе, достойнаго всех древних чудес! / Ходя по реце верху вод яко по суху, / на он пол немокренныма ногама прешел еси, / тезоименнаго ти аввы Великаго чудо повторяя. / О, красных ног! О, чудеснаго шествия твоего, / Иоанникие преподобне.
Блажен еси, миротворче преподобне Серафиме, / мир Христов, сие сокровище смиренномудрыя твоея души, людем источал еси, / благодатным миром духовным братию обители соединяя, / молитвою и любовию отеческою в подвизех жития иноческаго их укрепляя.
Иннокентие, благоутробне и милосердне, / состраданием и любовию Христовою ко всем страждущым и бедствующым преисполненный, / недузи и болезни онех молитвою врачуя, / и кончиною праведною святость жития своего явил еси.
Богородичен: Труды неусыпныя благоустроения ради обители Твоея, Владычице, подъял есть преподобный Филарет, / велию любовь и благоговение к Тебе имея, / сего ради в Жизнь Вечную преселися в день Иверския Твоея иконы, / еюже и во обитель Глинскую благословение приял есть.
Ирмос: Сеннописанный мрак гаданий разорив / и верных прибытием истины, / Богоотроковицею, озарив сердца, // и нас светом Твоим, Христе, настави.
Егда велий подвиг странствования совершил еси, отче Василие, / во Святей Горе Афонстей и в стране Молдавстей подвизаяся, / во обители Святыя Руси преподобнаго старца Паисия учение принесл еси, / и иноков научил еси ум к Богу возводити и сердцем к Нему взывати: / Господи, Иисусе Христе, Сыне Божий, помилуй мя, грешнаго.
Любовию вся покрывал еси, блаженне Макарие, / сия бо, по слову апостола, не ищет своих си, / немощи немощных и тяготы братии носил еси, не себе угождая, / и тако исполнил еси закон Христов.
Иже хранит уста своя и язык, соблюдает от печали душу свою, — Притча глаголет; / ты же, отче Луко, в словесех Премудраго умудряяся, / был еси яко человек не слышай и не имый во устех своих обличения, / за словеса устен Господних пути жестоки сохранил еси, / глухотою мнимою подвиг молчания сокрыв.
Богородичен: О, коль близ есть Пресвятая Богородица почитающым Ея, / во храме освященном яко Светоносная Жена старцу Илиодору является, / и знамение сие велие Царицы Небесныя благоволение есть, / и обители Ея Святаго Имене Матернее благословение.
Ирмос: Ко Господу от кита Иона возопи: / Ты мя возведи из глубины ада, молюся, / да яко Избавителю, во гласе хваления, // истины же духом пожру Тебе.
Типиконом живым знания устава церковнаго ради от братии наречен был еси, отче Евфимие, / древним отцем, в пустыни подвизавшымся поревновал еси, / сего ради и келлию свою яко вертеп устроил еси, / великим столпам иночества по духу подражая.
Царствие Небесное нудится, и нуждницы восхищают е. / Ты же, отче Архиппе, злострадания и долготерпения образ на тесном пути иночестем приял еси, / буйством Христа ради мудрость Божественную приобрет, / премудрость Божию, в тайне сокровенную, юродством проповедал еси.
Емшися за вечную жизнь, в нюже и зван был еси, блаженне Феодоте, / страдания нынешняго века нивочтоже вменил еси, / поношения и заушения кротко претерпел еси, / и яко воду жизни, — по слову аввы горы Синайския, — испил еси поругание от всякаго человека.
Богородичен: Вратарнице благая, / сохраняй входы и исходы обители Глинския, / над святыми враты неусыпно на стражи стоящи, / и врата Царствия Небеснаго милостивно нам отверзи.
Днесь ликует обитель Глинская, / в прославлении преподобных отцев, в подвизе добрем просиявших, / и вси людие возвеселишася, / яко источник благодати чудесы изливается. / Темже убо, святии, печальницы душ наших, / умолите щедролюбиваго Бога, // молитвами Богородицы Небеснаго Царствия сподобитися.
Се что добро, или что красно, / но еже жити братии вкупе, / брат бо от брата помогаемь, яко град огражден есть; / вы же, преподобнии отцы, / во общаго жития братолюбии / пустынь Глинскую яко град тверд и до Небес высок созиждили есте, / укрепляемый якоже основанное царство, / и граждан своих земных // молитвами Богородицы Небеснаго Царствия сподобляюще.
В сей благознаменитый день, память совершаем преподобных отец, во обители Глинстей просиявших. Понеже убо Богоноснии отцы сии во обители Пресвятыя Богородицы Пречистаго Рождества подвигом добрым подвизашася, сего ради и собор их по празднице Богородичном совершати подобает.
Пустынь Глинская, сие, по слову преподобнаго Серафима Саровскаго, училище велие жития иноческаго, дарова мирови сонм Богоносных отцев, старцев, сей цвет иночества и монашества украшение, иже наследие преподобнаго отца Паисия, сиречь старчество, в вертограде пустыни Глинския насадиша и возрастиша.
Сего же полка Божественнаго преподобных отец имена сия суть: Филарет Богомудрый, обители Глинския строитель и возродитель духовный; Василий, добротолюбия наставник и умнаго делания рачитель; Феодот препростый, младенец незлобием и чистотою; Макарий блаженный, тяготы братии носивший; Мартирий псалмопевец, воздержания ревнитель; смиренномудрый Евфимий, древним отцем пустынным по духу подражатель; Досифей благоговейный, нестяжанием обогатившийся; Илиодор светлейший, в горниле тяжких испытаний чистее злата очищенный; Иннокентий благоутробный, сердце милующее стяжавший; Архипп, Христа ради юродствовавший; Лука, глухотою подвиг молчания сокрывший; Иоанникий чудотворец, немокренно по воде пешешествовавый; Серафим миротворец, отец отцев и братии ограда; старец и святитель Серафим, удела земнаго Пресвятыя Богородицы во святей Иверии архиерей преславный; Серафим, обители Глинския духовник, Абхазии красота и слава; Андроник исповедник, печальник и тайноведец душ человеческих.
Сии Богопросвещеннии отцы преподобнии подвиги и труды своими богатно плоды духовныя от Христа Бога нашего стяжаша, яже суть: любы, радость, мир, долготерпение, благость, милосердие, вера, кротость, воздержание, пророчество, чудотворения, прозрение, наипаче же Богомудрое разсуждение, сей «светильник души» и «жития кормило», якоже святии отцы рекоша, имже мнози душы страждущыя уврачеваша и ко спасению приведоша.
«Иже сотворит и научит, — Господь рече, — сей велий наречется в Царствии Небеснем». Сии шестьнадесять Богодостойных отец вся заповеди Христовы сотвориша и мнозем добродетелем чад своих научиша, наипаче же: помыслов откровению, послушанию блаженному и своея воли отсечению, и от святых отец учения сице глаголаша. Подобает убо помыслы стужающыя исповеданием изъявляти, оглашаеми бо, прогоняеми бывают. Якоже бо свету сияющу, тьма уступает, тако и свет исповедания потребляет помыслы страстей, яко и сии тьма суть. «Имже несть управления, падают, аки листвие, спасение же во мнозе совете есть». Послушание же вечныя жизни залог есть. Послушание бо и лютыя звери укротити может: свидетель словеси сему, иже отчу заповедь приим, связа гиену. Послушание и мертвыя чудотворити показует: и се яве есть, от гроба возгласив Акакий. И Сам убо Сын Божий послушлив быв до смерти крестныя, еюже миру спасение содея. Аще не бы сотворил Господь послушания и воли Своея не отреклся, не бы спаслся человек. Такожде не спасается человек, иже своея воли держится. А иже отцу своему духовному о Бозе покаряется, блажен есть и Сына Божия подобник, и тако спасение свое вечное соделовает.
Преподобных и Богоносных отец наших Глинских молитвами, Господи Иисусе Христе, Боже наш, помилуй нас, аминь.
Ирмос: Купина в горе огнеопальная и росоносная пещь халдейская / яве предписа Тя, Богоневесто, / Божественный бо невещественный в вещественнем чреве Огнь неопально прияла еси. / Темже из Тебе Рождшемуся поем: // благословен еси, Боже, отец наших.
Вольная нищета богатство монаха есть, / и вышних благ вкусивший презирает земная; / ты же, отче Досифее благоговейне, / богат сый нестяжанием, / сокровище свое на Небеси сокрыл еси, / вся попечения своя возложив на Господа, / Бога отец наших.
Плоти со страстьми и похотьми распятие претерпел еси, отче Мартирие, мучениче безкровне, / по имени твоему и житие твое, / принуждение себе во всяцем деле, яко делание иноческое, по слову аввы Захарии, творил еси, / ветхаго человека умерщвляя ради Христа, / Господа Бога отец наших.
Естества ветхаго человека сладости текущия и сластныя презрел еси, отче Архиппе, / ведал бо еси со апостолом, яко пострадавый плотию преста от греха, / плещи твоя вдал еси на раны и ланиты на заушение, / лица же твоего не отвратил еси от студа заплевания, / язвы на теле нося Господа Иисуса Христа, / Бога отец наших.
Богородичен: Се, ныне неплодныя утробы отверзаются, / естества нашего разрешая неплодство, / се, ныне Дева раждается, и мир обновляется, / рождения нашего духовнаго в Жизнь Вечную и обновления знамение совершается.
Ирмос: В пещи отрочестей прообразил еси иногда Твою Матерь, Господи, / образ же Сия из огня изымаше неопально входящия, / Юже поем, явльшуюся Тобою концем днесь, // и превозносим во вся веки.
Наставниче монахов, Богомудре Филарете, / и преподобнаго Серафима Саровскаго по духу собеседниче, / сподобился еси видети душу онаго, со славою ангелы на Небо несому, / и со безплотными поющу Господа Бога во вся веки.
Единствовав в трапезе братстей, отче Феодоте, препросте, / молитва же твоя бысть аки столп пламеновидный от земли до неба, / блажени бо чистии сердцем, яко тии Бога узрят, / поюще и превозносяще Его во вся веки.
Хвалебное псалмопение непрестанно возносил еси, отче Мартирие, / Богодохновенную Псалтирь на кийждо день изустно совершая, / и тако славословие выну от сердца Господу Богу изливал еси, / поя и превознося Его во вся веки.
Пресвятыя Богородицы удела земнаго архиерее преславный, / святителю и старче Серафиме богоблаженне, / наследия духовнаго обители Глинския верный последователю, / Промыслом Божиим служение свое в земли Иверстей совершал еси, / и ныне, праведниче Божий, в памяти нашей будеши во вся веки.
Рече апостол: подвизаяйся, от всех воздержится, да неистленен венец приемлет; / ты же, отче Серафиме, преподобне, / велия труды бодрствования и трезвения непрестаннаго подъял еси, / себе отвергся, спасения пасомых ради, / вождю духовный и печальниче душ человеческих, / и подвиги твоими в земли Абхазстей / пустынь Глинскую прославил еси во вся веки.
Отче Андрониче Богомудре, / око души своея рассуждением просветил еси, / якоже отцы рекоша, / и светильник ея елеем премудрости украсил еси, / ведче искусный сердец человеческих; / и во граде Тбилиси под Покровом Пречистыя подвизался еси / с собеседником и сотаинником Виталием блаженным, / истинным Евангелия Христова послушником; / и ныне на Небесех со отцы Глинскими купно водворяетеся, / молящеся Господу Богу спастися нам во вся веки.
Троичен: Святая Троице Единосущная, / мольбами преподобных и Богоносных старцев Глинских, / да не отлучимся Твоея славы, / от отцев бо покланятися навыкохом Единому Естеству Триипостасному.
Богородичен: Луку, молитвы делателя, гласом от иконы Твоея утешила еси, Владычице, рекши: / рабе Божий, храни веру благую Православную, / и сим оправдишися во вся веки.
Ирмос: Яже прежде Солнца Светильника Бога возсиявшаго, / плотски к нам пришедшаго, / из боку Девичу неизреченно воплотившая, / Благословенная Всечистая, // Тя, Богородице, величаем.
Августейшаго Дома благоволение снискавый, преподобне Филарете, / во граде святаго Петра яко Православия поборник прославился еси, / иноческаго отеческаго жития устроение от еретических лжеучений защищая, / Духом Святым просвещаемый.
Во огни злато искушается, / и человецы приятни Богу в пещи смирения. / Тако и ты, отче Илиодоре многострадальне, / горнило тяжких испытаний во очищение души прошел еси, / клевету, напраслину и изгнание из обители претерпев, / и сердце милующее от Господа стяжал еси, / во еже всем оскорбляемым и гонимым сострадати.
Иже аще хощет в вас вящший быти, да будет всем слуга, — рече Господь, / ты же, отче Евфимие смиренномудре, / страсть честолюбия презрев, священнаго сана уклонился еси, / всем быв рабом последним и меньшим слугою, / сего ради велий еси ныне в Царствии Небеснем.
Богородичен: Монашескаго жития начало в пустыни Глинстей явлением чудотворныя иконы Твоея положила еси, Пречистая Дево, / и ныне молим Тя смиренно, / да будет обитель Твоя иночества украшением / и старчества в земли нашей возрождением.
Учителие Евангелия словом и житием бысте, преподобнии, / сего ради ныне от Господа во святых прославлени есте; / иже бо сотворит едину заповедь Христову и тако научит человеки, / сей велий наречется в Царствии Небеснем.
Преподобнии отцы Глинстии, / нива души вашея плоды духовными угобзися: / любовию, радостию, миром, долготерпением, / благостию, милосердием, верою, / кротостию, воздержанием, / и большими сих даровании, / многоплодно житницу Небесную наполнили есте, // и ныне молите о душах наших.
Преподобнии старцы Глинстии, / блаженное послушание возлюбившии, / Христа ради отцем своим себе поработившии, / сего ради преуспесте и возвеличестеся, / якоже и Иисус, сын Сирахов, рече: / не отступай от повести старцев, / ибо тии навыкоша от отцев своих, / яко от них навыкоша разуму / и во время потребно отвещавати. / Мы же, братие, стопам отцев последующе, / повинуимся наставником нашым и о Бозе покаряемся, // тии бо бдят и молятся о душах наших.
Преподобнии отцы Глинстии, / свободни бывше от всех, всем себе поработили есте, / да множайшии душы во спасение приобрящете: / радовастеся с радующимися и с сущими в скорби печалистеся, / страждущым спострадасте, недужных уврачевасте, / немощных и в вере колеблющихся утвердисте, / всем бысте вся, да всяко некия спасете, / и ко Господу приведете, // молящеся о душах наших.
Изшедшии из Египта имеша наставником Моисея, / бежавшии же из Содома — ангела Божия; / мы же, хотящии душевныя и телесныя нечистоты совлечься, / кормчих имамы преподобных отец, / ходатаев к Богу и мужей равноангельных, / иже стояще посреде деяния и видения, / воздевают руце за ны ко Господу, / дабы, наставляемии ими, / море греховное пешешествовали, // и Амалика мысленнаго страстей возмогли победити.
Блаженны праздника, песнь 1-я перваго канона, на 4 и святых, песнь 3-я, на 4. Прокимен праздника, таже святых, глас 7: Честна пред Господем смерть преподобных Его. Стих: Что воздам Господеви о всех, яже воздаде ми? Апостол к Галатом, зачало 213. Аллилуиа праздника, таже святых, глас 6: Блажен муж, бояйся Господа, в заповедех Его восхощет зело. Стих: Сильно на земли будет семя его. Евангелие от Матфея, зачало 10. Причастен праздника, таже святых: Радуйтеся, праведнии, о Господе, правым подобает похвала.
О, преподобнии и Богоноснии отцы наши Глинстии: Филарете, Василие, Феодоте, Макарие, Мартирие, Евфимие, Досифее, Илиодоре, Иннокентие, Архиппе, Луко, Иоанникие, Серафиме, святителю Серафиме, Серафиме другий и Андрониче!
Вы есте иночества цвет, Богомудрии старцы и учителие, печальницы и ведцы душ человеческих, врачеве искуснии недугов душевных и телесных, кормчии духовнии и отцы чадолюбивии! Вами пустынь Глинская хвалится и честными мощми вашими прославляется. Мы же, по слову апостола, яко наставников наших вас поминаем и со умилением сердца просим: будите нам руководители в Царствие Небесное; светом добродетелей, яко звезды небесныя на тверди Церковней, сияюще, укажите нам путь в горния обители. Помозите нам иго жизненнаго креста со упованием до конца пронести и в терпении душы наша стяжати; юных послушанию научите, старцем мудрость духовную и разсуждение даруйте, всем же — братолюбие и о Бозе любовь нелицемерную. Молитеся ко Господу, да возродит старчество и истинный дух монашеский во обителех земли нашея; да познаим, яко Царствие Божие внутрь нас есть и прославим Бога в телесех наших и в душах наших, яже суть Божия; да совлечемся ветхаго человека со страстьми и похотьми, и да облечемся в новаго, обновляемаго по образу Христа Бога нашего, Емуже слава, честь и поклонение подобает со Отцем и Святым Духом, ныне и присно, и во веки веков. Аминь.